“මම තමයි බොස් (ප්‍රධානියා),” යැයි පවසමින් ඩොනල්ඩ් ට්‍රම්ප් තෙදින ජී7 (G7) සමුළුවේ අවසන් දින උදෑසන සැසිය වෙත පියනැගුවේය. ඒ වන විටත් සෙසු රාජ්‍ය නායකයෝ තම අසුන්වල අසුන්ගෙන සිටියහ.

එහිදී මතු වූ සිනහව මධ්‍යයේ, ප්‍රංශ ජනාධිපති එමානුවෙල් මැක්‍රෝන් එම ප්‍රකාශය සුහදශීලීව බාරගන්නා අයුරු දක්නට ලැබිණි. “ඔයාට කොහොමද?” ප්‍රංශ ජනාධිපතිවරයා ට්‍රම්ප්ගෙන් විමසා සිටියේය.

“හොඳයි, ස්තූතියි,” යැයි පවසමින් ට්‍රම්ප් අවසානයේ සිය අසුන වෙත ගියේය. ජනාධිපති වීමට පෙර ප්‍රකෝටිපති ව්‍යාපාරිකයකු වූ ට්‍රම්ප්, “ඔයාව රස්සාවෙන් අයින් කළා!” (You’re fired!) යන ප්‍රකට පාඨය සහිත “දි ඇප්‍රෙන්ටිස්” නමැති රූපවාහිනී වැඩසටහන මෙහෙයවීම නිසා ලොව පුරා ප්‍රසිද්ධියට පත්වූවෙකි.

ඉරානය සමඟ පවතින යුද්ධය අවසන් කිරීමේ එකඟතාවයකට එළඹීම සහ සිය 80 වැනි උපන්දිනය සැමරීමෙන් පසුව ජිනීවා විල අසල පිහිටි ඒවියන් නමැති නගරයේ පැවැත්වෙන මෙම සමුළුව වෙත පැමිණි ට්‍රම්ප්, මුළු සමුළුවේම අවධානය තමන් වෙත නතුකර ගැනීමට සමත් විය.

මීට පෙර කැනඩාවේ පැවැති සමුළුව මෙන් නොව, අනාවැකි කිව නොහැකි චරිතයක් සතු ඇමරිකානු ජනාධිපතිවරයා මෙවර සමුළුවේ මුල සිට අග දක්වාම රැඳී සිටීම සහ ජී7 ඒකාබද්ධ ප්‍රකාශනයට අත්සන් තැබීම පිළිබඳව ප්‍රංශ නිලධාරීන් සතුටට පත්වනු ඇත.

විශේෂ ඇගයීමක් වශයෙන්, බදාදා පස්වරුවේ සමුළුව අවසන් වීමෙන් පසු පැරිස් නුවරින් පිටත පිහිටි සුප්‍රකට වර්සායි මාලිගයේ පැවැත්වෙන රාත්‍රී භෝජන සංග්‍රහයක් සඳහා මැක්‍රෝන් විසින් ට්‍රම්ප් වෙත ආරාධනා කර තිබිණි.

කෙසේවෙතත්, තමන් ට්‍රම්ප් ඉදිරියේ ඕනෑවට වඩා ගැති වන බවක් පෙන්වීමට අකමැති වීම හේතුවෙන්, ප්‍රංශ ජනාධිපති මැක්‍රෝන් දැනටමත් ප්‍රකාශ කර ඇත්තේ වර්සායි මාලිගයේ පැවැත්වෙන මෙම රාත්‍රිය නිල උත්සව Gala මට්ටමේ සුපිරි භෝජන සංග්‍රහයක් නොවන බවයි.