වලිකාමම් දකුණ ප්‍රාදේශීය සභාවට අයත් ඉඩමක රුපියල් මිලියන 330ක පිරිවැයකින් ඉදිකිරීමට යෝජිත අලුත් ගෘහස්ථ ක්‍රීඩා සංකීර්ණය සඳහා මුල්ගල තැබීම පසුගිය අඟහරුවාදා (25) සිදුකෙරිණි.

ඉලංගෙයි තමිල් අරසු පක්ෂය විසින් ක්‍රියාත්මක කිරීමට සූදානම් වන මෙම ව්‍යාපෘතිය මගින්, අතහැර දැමූ ක්‍රීඩාංගණ යෝජනාවක් සම්බන්ධයෙන් රජය ගෙනගිය “මලානික දේශපාලන න්‍යායපත්‍රය” එළිදරව් වන බව එම පක්ෂයේ පාර්ලිමේන්තු කණ්ඩායම් නායක ෂානක්‍යන් රාසමාණික්කම් මෙහිදී පැවසීය.

මීට පෙර ආණ්ඩුව විසින් යාපනය ඓතිහාසික පැරණි උද්‍යාන (Old Park) පරිශ්‍රයේ රුපියල් මිලියන 170ක පිරිවැයකින් ක්‍රීඩාංගණයක් ඉදිකිරීමට යෝජනා කර තිබිණි. එහෙත් 1853 තරම් ඈත අතීතයකට දිවයන එම භූමිය භාරකාර දේපලක් බැවින්, මහා අධිකරණය නිකුත් කළ අතුරු තහනම් නියෝගයක් හේතුවෙන් එහි වැඩකටයුතු අත්හිටුවීමට සිදුවිය.

එම සිදුවීම සම්බන්ධයෙන් අදහස් දැක්වූ මන්ත්‍රී රාසමාණික්කම්, සිය පක්ෂය සංවර්ධනයට එරෙහි බවට මතයක් නිර්මාණය කිරීමට රජය උත්සාහ කළ බවත්, යම් ස්ථානයක නීතිමය ගැටලුවක් පවතින විට කළ යුත්තේ ව්‍යාපෘතිය අතහැර අන් අයට චෝදනා කිරීම නොව විකල්ප ස්ථානයක් සොයාගැනීම බවත් පෙන්වාදුන්නේය.

ඉලංගෙයි තමිල් අරසු පක්ෂය පාලනය යටතේ පවතින ප්‍රාදේශීය සභාව විසින් රජයේ යෝජිත මුදල මෙන් දෙගුණයකට ආසන්න මුදලක් ආයෝජනය කරමින් මෙම පියවර ගෙන ඇත්තේ පක්ෂය සංවර්ධනයට එරෙහි නොවන බව ක්‍රියාවෙන් ඔප්පු කරමින් යැයිද හෙතෙම සඳහන් කළේය.

ප්‍රාදේශීය සභා අරමුදල් මගින් ක්‍රියාත්මක වන මෙම ව්‍යාපෘතිය හරහා ප්‍රදේශයේ යෞවන යෞවනියන්ට සහ ක්‍රීඩකයන්ට නවීන පහසුකම් හිමිවන අතර, යාපනය දිස්ත්‍රික්කයේ ක්‍රීඩා යටිතල පහසුකම් සැලකිය යුතු ලෙස වර්ධනය වනු ඇත.

කොළඹටම වී තීන්දු ගන්නවා වෙනුවට පළාත් සභාවලට සහ ප්‍රාදේශීය ආයතනවලට බලය සහ සම්පත් බෙදාහැරීමේ වැදගත්කමද, මහා පරිමාණ මහජන මුදල් ආයෝජනය වන මෙවැනි ගොඩනැගිලි නඩත්තු කිරීම සඳහා විශේෂ අරමුදලක් පැවැතීමේ අවශ්‍යතාවද ඔහු වැඩිදුරටත් අවධාරණය කළේය.

වැලිකාමම් දකුණ ප්‍රාදේශීය සභාවේ සභාපති ටී. ප්‍රකාශ්ගේ මූලිකත්වයෙන් පැවැති මෙම උත්සවයට ඉලංගෙයි තමිල් අරසු පක්ෂ සභාපති සී.වී.කේ. සිවඥානම්, ප්‍රධාන ලේකම් එම්.ඒ. සුමන්තිරන්, යාපනය නගරාධිපති ඇතුළු ප්‍රදේශයේ මහජන නියෝජිතයෝ රැසක් එක්ව සිටියහ.