November 17, 2025
ජනවාරි මාසයේදී විශ්‍රාම ගිය වවුනියාවේ හිටපු මහාධිකරණ විනිසුරු එම්. ඉලංචේලියන් දෙමළ ඩයස්පෝරා සංවිධානවල ආරාධනයෙන් යුරෝපයේ සංචාරය කර තිබේ.
ඔහුගේ මෙම සංචාරය සිදුවන්නේ අභියාචනාධිකරණයට උසස්වීමක් නොලැබීම සම්බන්ධයෙන් ඔහු විසින් පැමිණිලි කර තිබූ පසුබිමකය.
කෙසේවෙතත්, පළාත් සභා මැතිවරණයක් පැවැත්වුවහොත්, ප්‍රධාන අමාත්‍ය ධුරය සඳහා ඇතැම් කණ්ඩායම් ඔහුව ‘විකල්ප’ අපේක්ෂකයකු ලෙස ඉදිරිපත් කිරීමට කරන උත්සාහයන් ඩයස්පෝරා කවයන් තුළ යම් අවධානයක් ඇති කර තිබේ.
ඔහු සහභාගී වූ ඇතැම් සැසිවලදී නැගුණු ප්‍රශ්නවලට ප්‍රතිචාර දක්වමින් හිටපු විනිසුරුවරයා ද දේශපාලනය ‘පිරිසිදු’ කර ජනතාව මෙහෙයවීමේ අවශ්‍යතාව අනුමත කළ බව පෙනේ.
විශ්‍රාම යෑමට දින කිහිපයකට පෙර, විනිසුරු ඉලංචේලියන් ජනාධිපති අනුර කුමාර දිසානායක වෙත ලිපියක් යවමින් අධිකරණ ක්ෂේත්‍රයේ ඊළඟ ස්ථරයට තමා පත් කිරීම ගැන සළකා බලන ලෙස ඉල්ලා සිටියද, අවාසනාවකට එය ක්‍රියාත්මක නොවීය.
පැරිසියේ රැස්වීමට සහභාගී වූ පුරවැසියකු විනිසුරුවරයාගෙන් සහ ඩයස්පෝරා සංවිධානවලින් එන සියලු මිශ්‍ර අදහස්වලින් පසු “විශ්‍රාම ගිය විනිසුරුවරුන් දේශපාලනයට ආවා දැන් ඇති” යනුවෙන් ප්‍රකාශ කර තිබිණි.
ඔහු බොහෝ විට සඳහන් කරන්නට ඇත්තේ දේශපාලනඥයකු බවට පත් වූ හිටපු ශ්‍රේෂ්ඨාධිකරණ විනිසුරුවරයකු වන සී. වී. විග්නේෂ්වරන් උතුරු පළාතේ මහ ඇමති ලෙස කටයුතු කළ ආකාරය සහ ඔහු කවුන්සිලය පවත්වාගෙන ගිය ආකාරය ගැන විය හැකිය.
එය ඉලන්චේලියන්ට ලබාදුන් නරක පූර්වාදර්ශයක් ලෙස පෙනේ.
