එළඹෙන T20 ලෝක කුසලානයෙන් පසු බොහෝදුරට ප්‍රධාන පුහුණුකරු ධුරයෙන් තමන් ඉවත්විය හැකි බවට සනත් ජයසූරිය ඉඟිකර තිබේ.

කෙසේවෙතත් ශ්‍රී ලංකා ක්‍රිකට් ආයතනය පෙන්වා දී ඇත්තේ තරඟාවලියෙන් ඔබ්බට ද ඔහු සමඟ අඛණ්ඩව කටයුතු කිරීමට විවෘතව සිටින බවයි.

තම අවධානය ලෝක කුසලානය කෙරෙහි දැඩි ලෙස යොමු වී ඇති බවත්, තම කොන්ත්‍රාත්තුව ලෝක කුසලානයෙන් ඔබ්බට ගියද දිගු කාලීනව එම තනතුරේ රැඳී සිටීමට අදහස් නොකරන බවත් පුවත්පතක් සමග සම්මුඛ සාකච්ඡාවකට එක්වෙමින් සනත් ජයසූරිය ප්‍රකාශ කර තිබේ.

“මගේ අවධානය T20 ලෝක කුසලානයයි, මගේ කොන්ත්‍රාත්තුව ලෝක කුසලානයෙන් ඔබ්බට ගියත් එල්ලිලා ඉන්න මගේ අදහසක් නැහැ,” ජයසූරිය පැවසීය.

ඉන්දියාවට එරෙහිව පැවති ගෘහස්ථ තරගාවලියට පෙර 2024 ජූලි මාසයේදී තාවකාලික පත්වීමක් ලෙස ජයසූරිය මුලින් පත්කරන ලදී.

කෙසේවෙතත්, දශක ගණනාවකට පසු ශ්‍රී ලංකාව ඉන්දියාවට එරෙහිව එක්දින තරගාවලියක් ජයග්‍රහණය කිරීම තුළින් එම වසර අගදී පූර්ණ කාලීන පදනම මත ඔහුව ප්‍රධාන පුහුණුකරු ලෙස පත්කිරීමට ශ්‍රී ලංකා ක්‍රිකට් ආයතනය පෙළඹවීය.

ඔහු මීට පෙර 2023 දෙසැම්බර් මාසයේදී ජාතික ඉහළ කාර්ය සාධන මධ්‍යස්ථානයේ උපදේශකයකු ලෙස සම්බන්ධ වී සිටියේය.

ප්‍රධාන පුහුණුකරු ලෙස ජයසූරියගේ ධුර කාලය තුළ, ශ්‍රී ලංකාව සියලුම ආකෘතිවලින් තරඟ 60ක් ක්‍රීඩා කර ඇති අතර, ජයග්‍රහණ 29ක්, පරාජයන් 29ක් සහ ජය පරාජයෙන් තොර තරග දෙකක් වාර්තා කර ඇත.

එමඟින් ඔහුට සියයට 50ක ජයග්‍රාහී වාර්තාවක් ලබා දී ඇති අතර මිශ්‍ර ප්‍රගතියක් පිළිබිඹු වේ.

පාකිස්ථානයට සහ එංගලන්තයට එරෙහිව පැවැත්වෙන ගෘහස්ථ තරඟාවලිය කණ්ඩායමේ ලෝක කුසලාන සූදානම සඳහා කේන්ද්‍රීය ස්ථානයක් ලෙස ජයසූරිය විස්තර කරයි.

සංයෝජන තීරණය කිරීමට, තීරණ ගැනීම තියුණු කිරීමට සහ හුරුපුරුදු තත්ත්වයන් යටතේ සහ පීඩනය යටතේ ක්‍රීඩකයන් පරීක්ෂා කිරීමට හොඳම අවස්ථාව මෙම තරඟාවලි මඟින් ලබාදෙන බව පවසයි.

ශ්‍රී ලංකාවේ T20 කණ්ඩායම තවදුරටත් දියුණුවීම අවශ්‍ය බව ඔහු පිළිගෙන ඇති අතර, විශේෂයෙන් පිතිකරණ වේගය සහ පන්දු යැවීමේදී මෙන්ම ප්‍රධාන අදියරවලදී ලබා ඇති ප්‍රගතිය පිළිබඳ ඔහු සෑහීමකට පත්වේ.

1996 එක්දින ලෝක කුසලාන ජයග්‍රහණයේ දී තරගාවලියේ ක්‍රීඩකයා ලෙස සහ 2014 T20 ලෝක කුසලානය ශ්‍රී ලංකාව දිනාගත් විට තේරීම් කමිටු සභාපති ලෙස ජයසූරිය මීට පෙර තීරණාත්මක කාර්යභාරයක් ඉටුකර ඇති අතර, දැන් පුහුණුකරු ධුරයෙන් තුන්වැනි ශූරතාවට දායකවීමට උත්සාහ කරමින් සිටියි.

මේ අතර, ශ්‍රී ලංකා ක්‍රිකට් සභාපති ෂම්මි සිල්වා පැවසුවේ ජයසූරිය විසින් සිදුකරනු ලබන කාර්යයන් පිළිබඳ මණ්ඩලය සතුටු වන බවත්, ඔහුගේ ප්‍රායෝගික ප්‍රවේශය සහ ක්‍රීඩකයන් සමඟ සමීප සම්බන්ධතාව අගය කරන බවයි.

T20 ලෝක කුසලානයෙන් පසු ජයසූරියගේ අනාගතය පිළිබඳ ඔහු සමග සාකච්ඡා කිරීමට ශ්‍රී ලංකා ක්‍රිකට් ආයතනය අදහස් කරන බවත්, තරගාවලියෙන් ඔබ්බට ඔහු සමඟ අඛණ්ඩව කටයුතු කිරීමට මණ්ඩලය කැමැත්තෙන් සිටින බවත් මාධ්‍ය හමුවකදී අදහස් දක්වමින් සිල්වා පවසා තිබිණි.

කාන්තා කණ්ඩායම ශක්තිමත් කිරීමේ උත්සාහයන්හි කොටසක් ලෙස, දේශීය පුහුණුකරු වන රුමේෂ් රත්නායක සමඟ වත්මන් ගිවිසුමෙන් ඉවත් වී, ශ්‍රී ලංකා කාන්තා කණ්ඩායම සඳහා විදේශීය ප්‍රධාන පුහුණුකරුවකු පත්කිරීමට ශ්‍රී ලංකා ක්‍රිකට් සැලසුම් කර ඇති බව ද සිල්වා තහවුරු කළේය.