කැරිබියන් දූපත් හරහා හමා ගිය මෙලිසා සුළි කුණාටුවෙන් මියගිය පුද්ගලයින් සංඛ්‍යාව 43 දක්වා ඉහළ ගොස් ඇතැයි හයිටි රජය පවසයි.

අතුරුදන් වී ඇති පුද්ගලයින් සංඛ්‍යාව 13 කි.

නායයෑම් සහ ගංවතුර හේතුවෙන් විනාශ වූ රටේ නිරිතදිග කලාපයේ ප්‍රදේශ වෙත ළඟා වීමට සහන සේවා කණ්ඩායම් දැඩි පරිශ්‍රමයක් දරමින් සිටියි.

දැඩි ලෙස පීඩාවට පත් ප්‍රදේශයක් වන පෙටිට්-ගෝවේ හි නිරිතදිග වෙරළබඩ නගරයේ අවම වශයෙන් මරණ 25 ක් සිදුවිය.

වාර්තාගතව ඇති ප්‍රබලතම අත්ලාන්තික් සුළි කුණාටු වලින් එකක් වන 5 වන කාණ්ඩයේ මෙලීසා කුණාටුව, පසුගිය සතියේ හයිටියට කඩා වැදුනු අතර නිවාස 12,000 කට ආසන්න ප්‍රමාණයක් ජලයෙන් යටවී තවත් 200 කට ආසන්න ප්‍රමාණයක් විනාශ විය. බොහෝ මාර්ග ප්‍රවේශ විය නොහැකිව පවතී.

ප්‍රදේශ රැසක පානීය ජල හිඟයක් පවතින බවත්, කෘෂිකාර්මික වශයෙන් විශාල පාඩු ලබන ගොවීන්ට බීජ සහ මෙවලම් ඉක්මනින් බෙදා දෙන බවත් රජය පවසයි..

1,700 කට වැඩි පිරිසක් තවමත් ආරක්ෂිත ස්ථානවල රැඳී සිටිති.

මේ අතර කුණාටුවෙන් බලපෑම් එල්ල වූ ජැමෙයිකාවේ ද අවම වශයෙන් පුද්ගලයින් 32 දෙනෙකු මිය ගිය අතර, එම සංඛ්‍යාව ඉහළ යනු ඇතැයි නිලධාරීන් අනතුරු ඇඟවීය.

මේ අතර මෙලීසා සුළි කුණාටුවෙන් පීඩාවට පත් ජැමෙයිකාව සහ කියුබාව සඳහා මානුෂීය ආධාර ටොන් 20 ක් බෙදා හැරීම සඳහා ඉන්දීය ගුවන් හමුදා ගුවන් යානයක් අඟහරුවාදා ඉන්දියාවෙන් පිටත් වූ බව විදේශ කටයුතු අමාත්‍ය එස් ජයශංකර් පැවසීය.

සිය X ගිණුමේ සටහනක් තබමින් අමාත්‍යවරයා පැවසුවේ සහන ද්‍රව්‍ය අතරට පුනරුත්ථාපන ආධාරක අයිතම, ආහාර සහ දෛනික උපයෝගිතා, ඖෂධ, වෛද්‍ය උපකරණ, විදුලි ජනක යන්ත්‍ර, නවාතැන් ආධාරක සහ සනීපාරක්ෂක කට්ටල ඇතුළත් බවයි.

”මෙවැනි ස්වාභාවික විපත් හමුවේ ඉන්දියාව අපගේ ගෝලීය දකුණු හවුල්කරුවන් සමඟ සිටින අතර යථා තත්ත්වයට පත්වීම සහ ප්‍රතිසංස්කරණය සඳහා අපගේ මිතුරන්ට සහාය වනු ඇත,” යනුවෙන් ද ඔහු සඳහන් කර තිබේ.