ශ්‍රී ලංකාව තුළ ප්‍රථම වරට විදුලියෙන් ක්‍රියාත්මක වන, සිරස් අතට ගුවනට නැගිය හැකි සහ ගොඩබෑසිය හැකි යානා (eVTOL) තාක්ෂණය සඳහා නියාමන රාමුවක් සකස් කිරීමේ වේගවත් වැඩසටහනක් ශ්‍රී ලංකා සිවිල් ගුවන් සේවා අධිකාරිය විසින් ආරම්භ කර ඇති අතර, එමගින් විදුලි ‘පියාසර ටැක්සි’ (Flying Taxi) තාක්ෂණය පරීක්ෂා කිරීම සඳහා ශ්‍රී ලංකාව තවත් ආසන්න වී තිබේ.

‘EHang Intelligent’ සමාගමේ ගෝලීය වේගවත් වැඩසටහන (Global Fast-Track Programme) යටතේ ඉදිරිපත් කරන ලද යෝජනා සිවිල් ගුවන් සේවා අධිකාරිය විසින් පිළිගෙන ඇති අතර, මාස හතරක් ඇතුළත මෙම නියාමන රාමුව ඔස්සේ මූලික වාණිජ කටයුතු ආරම්භ කිරීම ඉලක්ක කරගෙන ඇත.

eVTOL යනු සාම්ප්‍රදායික ධාවන පථයක් (Runway) අවශ්‍ය නැති, සිරස් අතට ගුවනට නැගීමට සහ ගොඩබෑමට හැකියාව ඇති විදුලියෙන් ක්‍රියාත්මක වන ගුවන් යානා තාක්ෂණයකි. මගී ප්‍රවාහනය සහ අනෙකුත් උසස් ගුවන් ගමන් පහසුකම් උදෙසා මෙම තාක්ෂණය දැනට ලොව පුරා සංවර්ධනය කරමින් පවතී.

කෙසේවෙතත්, මෙම මාස හතරක ඉලක්කයෙන් අදහස් වන්නේ මුළු දිවයිනටම බලපැවැත්වෙන පරිදි වාණිජ පියාසර ටැක්සි සේවාවක් සඳහා අනුමැතිය හිමිවී ඇති බව නොවේ.

ඊට පටහැණිව, මෙම නියාමන රාමුව මගින් සිදුවන්නේ නියාමකයන් විසින් අදාළ ආරක්ෂණ, තාක්ෂණික සහ මෙහෙයුම් අවශ්‍යතා ඇගයීමට ලක්කරන අතරතුර, eVTOL මෙහෙයුම් පිළිබඳව පරීක්ෂා කිරීමට සහ හඳුන්වා දීමට පාලනය කළ හැකි පරිසරයක් සපයා දීමයි.

EHang සමාගම සහ වරාය හා සිවිල් ගුවන් සේවා අමාත්‍යාංශය අතර පැවැති සාකච්ඡාවලින් අනතුරුව සිවිල් ගුවන් සේවා අධිකාරිය සමඟ පැවැති තාක්ෂණික සාකච්ඡාවලින් පසුව මෙම වැඩසටහන ඉදිරියට ගෙන ගොස් ඇත.

EHang සමාගමේ නියෝජිත පිරිසක් සිවිල් ගුවන් සේවා අධ්‍යක්ෂ ජනරාල් සහ ප්‍රධාන විධායක නිලධාරී කප්පිත්ත දමින්ද රඹුක්වැල්ල ඇතුළු සිවිල් ගුවන් සේවා අධිකාරියේ නිලධාරීන් සමඟ මෙම වැඩසටහන ක්‍රියාත්මක කිරීම පිළිබඳව සාකච්ඡා පවත්වා තිබේ.

එහිදී නියාමන අවශ්‍යතා, ගුවන් යානාවල පිරිවිතරයන් (Specifications), යටිතල පහසුකම්, ගුවන් සීමා පිළිබඳ කරුණු, නඩත්තු කටයුතු, කාර්ය මණ්ඩල අවශ්‍යතා සහ eVTOL සේවාවන් සඳහා අවශ්‍ය මෙහෙයුම් රාමුව පිළිබඳව දීර්ඝ ලෙස සාකච්ඡා කර ඇත.

අවශ්‍ය නියාමන, තාක්ෂණික, මෙහෙයුම් සහ ආරක්ෂණ ඇගයීම් සහ අනුමැතීන් සාර්ථකව ලබා ගැනීම මත මෙම මාස හතරක කාලරාමුව තීරණය වන බව සිවිල් ගුවන් සේවා අධිකාරිය වැඩිදුරටත් ප්‍රකාශ කළේය.

ශ්‍රී ලංකාවට මෙම උසස් ගුවන් ගමන් තාක්ෂණය හඳුන්වා දීමේ හැකියාව පිළිබඳව අධ්‍යයනය කරමින් සිටින බැවින්, EHang සමාගම සහ සිවිල් ගුවන් සේවා අධිකාරිය අතර ඉදිරියේදීත් වැඩිදුර තාක්ෂණික සාකච්ඡා පැවැත්වීමට නියමිතය.