අල්ලස් හෝ දූෂණ චෝදනා විමර්ශන කොමිසම හමුවේ පෙනී සිටි හිටපු අමාත්‍ය ප්‍රසන්න රණතුංග අද (12) උදෑසන අත්අඩංගුවට ගෙන තිබේ.

ප්‍රකාශයක් ලබා දීම සඳහා පැමිණෙන ලෙස හිටපු අමාත්‍යවරයාට අල්ලස් කොමිසම දැනුම් දී තිබිණි.

ඒ දැනට සිදුවෙමින් පවතින පරීක්ෂණයකට අදාළව ය.

අල්ලස් කොමිසමට අනුව ප්‍රසන්න රණතුංග අත්අඩංගුවට ගෙන ඇත්තේ, සංචාරක අමාත්‍යාංශය යටතේ ඇති ආයතන හතරක, එනම් ශ්‍රී ලංකා සංචාරක සංවර්ධන අධිකාරිය, ශ්‍රී ලංකා සංචාරක ප්‍රවර්ධන කාර්යාංශය, ශ්‍රී ලංකා හෝටල් කළමනාකරණ ආයතනය සහ ශ්‍රී ලංකා සම්මේලන කාර්යාංශයේ සේවකයන් සඳහා සෘජු වෛද්‍ය රක්ෂණ විධිවිධාන පිළිබඳ අක්‍රමිකතා සම්බන්ධයෙනි.

මෙම රක්ෂණ යෝජනා ක්‍රම හැසිරවීම සඳහා පෞද්ගලික තැරැව්කාර සමාගමක් වන My Insurance Brokers නීති විරෝධී ලෙස පත් කර ඇති බව විමර්ශනවලින් හෙළි වේ.

පසුව, එම සමාගමට රුපියල් 4,750,828.72ක කොමිස් මුදලක් ගෙවීමට ශ්‍රී ලංකා රක්ෂණ සංස්ථාවට නියම කර ඇති අතර, එහි ප්‍රතිඵලයක් ලෙස තැරැව්කරුට අනවශ්‍ය මූල්‍ය ලාභයක් සහ රාජ්‍ය රක්ෂණ සංස්ථාවට පාඩුවක් සිදුවිය.

ශ්‍රී ලංකා රක්ෂණ සංස්ථාවට පාඩුවක් සිදුකිරීමේ චෝදනාව මත ප්‍රසන්න රණතුංග අත්අඩංගුවට ගෙන තිබේ.