මහ බැංකු කාර්ය මණ්ඩලයේ මෑත කාලීන වැටුප් වැඩිවීමට අදාළ නිර්දේශ ඇතුළත් වාර්තාව රාජ්‍ය මුදල් පිළිබඳ කාරක සභාව (COPF) අද පාර්ලිමේන්තුවට ඉදිරිපත් කළේය.

රාජ්‍ය මුදල් පිළිබඳ කාරක සභා සභාපති, පාර්ලිමේන්තු මන්ත්‍රී හර්ෂ ද සිල්වා වාර්තාව පාර්ලිමේන්තුවට ඉදිරිපත් කරමින් කියාසිටියේ ස්වාධීන කමිටුවක් මගින් වැටුප් වැඩිවීම සමාලෝචනය කිරීමට කමිටුව නිර්දේශ කරන බවයි.

එම සමාලෝචනයෙන් අනතුරුව සති 4කින් වාර්තාවක් භාරදීමට යෝජනා කර ඇති බවද ඔහු වැඩිදුරටත් පැවසීය.

පාර්ලිමේන්තු මන්ත්‍රී හර්ෂ ද සිල්වා පැවසුවේ, එතෙක් මහ බැංකු කාර්ය මණ්ඩලයේ වැටුප් වැඩිවීම් කල්දැමීමට රාජ්‍ය මුදල් පිළිබඳ කාරක සභාව නිර්දේශ කර ඇති බවයි.

වෘත්තීය කාර්ය මණ්ඩලය සඳහා වැටුප් තීරණය කිරීමේ ක්‍රමය වෘත්තීය නොවන සහ අනෙකුත් කාර්ය මණ්ඩලයෙන් වෙන් විය යුතු බව කාරක සභාව තරයේ නිර්දේශ කරන බව ඔහු වැඩිදුරටත් පැවසීය.

බැංකුවේ පාලක මණ්ඩලය විසින් අනුමත කරන ලද සේවකයන්ගේ වේතන සංශෝධනය කිරීම පිළිබඳ මන්ත්‍රීවරුන් කිහිපදෙනෙකු ප්‍රශ්න කිරීමත් සමඟ මෙම කරුණ රාජ්‍ය මුදල් පිළිබඳ කාරක සභාව වෙත ඉදිරිපත් කරන ලදී.

2024 – 2026 කාලසීමාව ආවරණය වන පරිදි වෘත්තීය සමිති සමඟ ඇති කර ගත් ත්‍රෛවාර්ෂික සාමූහික ගිවිසුම යටතේ මෙම වැටුප් වර්ධකය ලබා දී ඇති බව පාර්ලිමේන්තුවේදී කළ විමසීම්වලින් පසුව පැහැදිලි කිරීමක් කරමින් මහ බැංකු විධායක නිලධාරීන්ගේ සංගමය සඳහන් කළේය.

එම කාරණය තවදුරටත් පැහැදිලි කරමින් අදාළ සංගමය අවධාරණය කළේ 2024-2026 සඳහා වූ සාමූහික ගිවිසුම කළමනාකාරිත්වය සහ වෘත්තීය සමිති අතර පැවති සාකච්ඡාවක ප්‍රතිඵලයක් බවයි.

මහ බැංකුවේ වැටුප් අනෙකුත් සේවාවන්ට වඩා වැඩි බව රහසක් නොවන බවත් පීඩනයකින් තොරව තම රැකියාව කිරීමට තරගකාරී වැටුපක් අවශ්‍ය බවත් එම සංගමය වැඩිදුරටත් කියා සිටියේය.