වෙන්නප්පුව ලුණුවිල ප්‍රදේශයේදී කඩාවැටුණු ගුවන් හමුදා බෙල් 212 හෙලිකොප්ටරයේ සුන්බුන් එම ස්ථානයෙන් ඉවත්කර ඇත.

මේ අතර, සිද්ධිය සම්බන්ධයෙන් විමර්ශනය කිරීම සඳහා ගුවන් හමුදා ජ්‍යෙෂ්ඨ නිලධාරීන් ඇතුළු නව දෙනෙකුගෙන් යුත් කමිටුවක් පත්කර තිබේ.

ශ්‍රී ලංකා ගුවන් හමුදාව විසින් ගංවතුර සහ නායයෑම් අතරතුර මානුෂීය මෙහෙයුම් සිදුකරමින් ත්‍රිවිධ හමුදා, පොලිස්, ගිනි නිවන හමුදාව සහ ගලවා ගැනීමේ කණ්ඩායම් සමඟ අත්‍යවශ්‍ය සහාය ලබා දී ඇත.

ලුණුවිල පාලම අසල ජනතාවට ආහාර සහ සැපයුම් බෙදාහැරීමේ නිරතව සිටියදී හෙලිකොප්ටරය ඊයේ ගිං ඔයට කඩාවැටිණි.

ආරක්ෂිතව ගොඩබෑමට නියමුවන් උත්සාහ කළද, එය සාර්ථක වූයේ නැත.

ප්‍රදේශවාසීහු සහ ගලවා ගැනීමේ කණ්ඩායම් යානයේ සිටි නිලධාරීන් බේරාගැනීමට ක්‍රියාකළහ.

පසුව ඔවුන් මාරවිල රෝහලට ඇතුළත් කරන ලද නමුත් නියමුවා වූ 41 හැවිරිදි වින්ග් කමාන්ඩර් නිර්මාල් සියඹලාපිටිය මියගියේය.

පළපුරුදු ගුවන් නියමුවෙකු වන වින්ග් කමාන්ඩර් සියඹලාපිටිය මෑතකදී කොළඹ විශ්ව විද්‍යාලයෙන් අන්තර්ජාතික සබඳතා පිළිබඳ පශ්චාත් උපාධියක් සම්පූර්ණ කර ඇති අතර, උපාධි ප්‍රදානෝත්සවයට සහභාගී වීමට නියමිතව සිටියේය.