ගල් අඟුරු දහනය හේතුවෙන් පරිසරයට සාමාන්‍යයෙන් මුදා හරින රසදිය ප්‍රමාණය වසරකට කිලෝග්‍රෑම් 600ත් 650ත් අතර බව බලශක්ති විශ්ලේෂකයකු ගණනය කර තිබේ.

ඔහු මෙම ගණනය සිදුකර ඇත්තේ මෑත කාලීන ප්‍රමිතියෙන් තොර ගල් අඟුරු තොගවල රසදිය ඉහළ මට්ටමක පැවතිය හැකි බවත්, එමඟින් නොරොච්චෝලේ පදිංචිකරුවන්ට සෞඛ්‍ය අවදානමක් ඇති කළ හැකි බවටත් පරිසරවේදීන් මතු කළ කනස්සල්ල මධ්‍යයේය.

වාර්තා පෙන්වා දෙන්නේ ගල් අඟුරු කිලෝග්‍රෑමයකට රසදිය මිලිග්‍රෑම් 0.27අගයක් පවතින බවයි.

“අපි වසරකට ගල් අඟුරු මෙට්‍රික් ටොන් මිලියන 2.2 සිට 2.5 දක්වා භාවිත කරන නිසා, මෙය වාර්ෂිකව රසදිය කිලෝග්‍රෑම් 600-650කට දක්වා ළඟා වෙනවා,” යන්වෙන් දත්ත විශ්ලේෂණය කළ විධුර රලපනාව පැවසීය.

කාමර උෂ්ණත්වයේ දී රසදිය ද්‍රවයක් වන අතර මධ්‍යස්ථ උෂ්ණත්වවලදී වාෂ්පයක් බවට පත්වන බව ඔහු පැවසීය.

එබැවින්, එය දහනයේදී වාෂ්පයක් බවට පත්වන අතර එම නිසා අළු පෙරහන් තුළ අළු සමඟ ග්‍රහණය නොකෙරේ.

රසදිය කොටසක් සල්ෆර් පෙරහන තුළ සාගර ජලයට අවශෝෂණය වේ.

එය අළු පෙරහන් හරහා දහන කුටියෙන් පිටවන දුම් වායුව මත සාගර ජලය ඉසින යාන්ත්‍රණයකි.

ඉතිරිය චිමිනි හරහා දුම් වායුව තුළින් වායුගෝලයට මුදා හරිනු ලැබේ.

ශ්‍රී ලංකාවේ රසදිය දූෂණය පිළිබඳ අන්තර්ජාතික දූෂක තුරන් කිරීමේ ජාලය (IPEN) විසින් අධ්‍යයන දෙකක් පමණක් සිදු කර ඇති අතර, එකක් දේශීය පාරිසරික යුක්ති කේන්ද්‍රය සමඟ සහයෝගයෙන් සිදු කර ඇත.

රසදිය දැනටමත් අපගේ ධීවර කර්මාන්තයට බලපාන බව වැඩිදුර අධ්‍යයනයන් මගින් හෙළි වී ඇති බව ආචාර්ය රලපනාව පැවසීය.

“ලක්විජය ගල් අඟුරු බලාගාරයේ අඛණ්ඩ රසදිය විමෝචන පද්ධතියෙන් ලබාගත් දත්තවලින් හෙළි වන්නේ බලාගාරය රසදිය විමෝචනය සඳහා පාරිසරික තත්ත්වයන් උල්ලංඝනය කරන බවයි,” ඔහු ප්‍රකාශ කළේය.

“මෙය වයඹ පළාතේ පළාත් පරිසර අධිකාරිය විසින් බලාගාරයට පනවා ඇති පාරිසරික ප්‍රමිතීන් පැහැදිලිව උල්ලංඝනය කිරීමක්,” ඔහු අවධාරණය කළේය.

මෑත කාලීන දකුණු අප්‍රිකානු ගල් අඟුරු තොග භාවිත කළ කාලයේ සිට බලාගාරය ඉහළ අළු අන්තර්ගතයක් ජනනය කරන බවත්, දිනකට ආසන්න වශයෙන් මෙට්‍රික් ටොන් 800 සිට දිනකට මෙට්‍රික් ටොන් 1500-1800 දක්වා අළු නිෂ්පාදනය දෙගුණයකට වඩා වැඩි බවත් දත්ත පෙන්වා දෙන බව ආචාර්ය රලපනාවේ පෙන්වා දුන්නේය.

වත්මන් කොන්ත්‍රාත්තුව යටතේ දකුණු අප්‍රිකාවෙන් පැමිණෙන ගල් අඟුරු අළු ඉහළ මට්ටමක පවතින බවට මෙය පැහැදිලි ඇඟවීමකි.

“සිංහල සහ දෙමළ අලුත් අවුරුද්ද තුළ සිමෙන්ති සමාගම් සති දෙකකට වැඩි කාලයක් වසා දැමීමත් සමඟ, ජනනය වන අළුවල සම්පූර්ණ ප්‍රමාණය අළු අංගනයට බැහැර කිරීමට බල කෙරෙන බැවින් ගැටළුව උත්සන්න වනු ඇතැයි අපේක්ෂා කරනවා. මෙය ප්‍රජාවට කරන බලපෑම බෙහෙවින් වැඩි කරන්න පුළුවන්.” ඔහු අනතුරු ඇඟවීය.