May 11, 2026
පෞද්ගලික අංශයට යූරියා පොහොර බෙදා හැරීම සඳහා අවසර දීමට රජය තීරණය කර ඇති බව කෘෂිකර්ම දෙපාර්තමේන්තුවේ අධ්යක්ෂ ජනරාල් ආචාර්ය තුෂාර වික්රමාරච්චි පවසයි.
අධ්යක්ෂ ජනරාල්වරයා විශ්වාසය පළ කළේ පවතින පොහොර ගැටළුව මෙම සතිය තුළ විසඳනු ඇති බවටයි.
පොහොර හිඟයක් පිළිබඳ අසත්ය කතා නිර්මාණය නොකරන ලෙස ඔහු ඉල්ලා සිටි අතර, ගොවීන් එවැනි වාර්තාවලට විශේෂයෙන් සංවේදී බව ද සඳහන් කළේය.
රට තුළ ප්රමාණවත් පොහොර තොග පවතින බවත්, ඉදිරි මහ කන්නය සඳහා පොහොර සැපයුම් ලබා ගැනීමට රජය දැනටමත් වැඩසටහනක් සකස් කර ඇති බවත් ආචාර්ය වික්රමාරච්චි තවදුරටත් පැවසීය.
මේ අතර, වගාවට අවශ්ය පොහොර ලබා ගැනීම සඳහා ගෙවීම් කර ඇතත්, තවමත් තම ප්රතිපාදන ලැබී නොමැති බව ගොවීන් පවසා තිබේ.
යල කන්නයට අවශ්ය සියලුම පොහොර වර්ග රට තුළ ඇති බවත් ගොවීන්ට බෙදා හැරීමේ යාන්ත්රණය දැනටමත් ආරම්භ කර ඇති බවත් කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල් කාන්ත ඇතුළු දේශපාලන නියෝජිතයන් කිහිප දෙනෙකු විසින් සහතික කර තිබියදීත් මෙම තත්ත්වය ඇති වී තිබේ.
දිස්ත්රික්ක කිහිපයකින් වාර්තා වන පරිදි ගොවීන් රැසකට තවමත් පොහොර ලැබී නොමැත.
පවතින හිඟය බෝගවල සෞඛ්යයට අහිතකර ලෙස බලපාන අතර දිලීර රෝග සඳහා ඇති අවදානම වැඩි කරන බව ගොවීන් පෙන්වා දී ඇත.
හදිසි අවශ්යතාවක් තිබියදීත්, ත්රිත්ව සුපිරි පොස්පේට් (TSP) නොහොත් මඩ පොහොර නොමැති වීමෙන් තත්ත්වය තවත් උග්ර වී ඇති බව ද ඔවුන් ප්රකාශ කර ඇත.
ගොවීන්ට අනුව, මඩ පොහොර ලබා ගැනීම සඳහා අප්රේල් මාසයේදී ගොවිජන සේවා මධ්යස්ථාන වෙත ගෙවීම් සිදු කළද, මේ දක්වා ප්රමාණවත් ප්රමාණයක් ලැබී නොමැත.
මේ අතර, දෙහිඅත්තකණ්ඩිය සහ මහවැලි සී කලාපයේ ගොවීන්ට රුපියල් 13,250ක මිලකට සඳුන්පුර ගොවිජන සේවා මධ්යස්ථානය හරහා බෙදා හරින ලද මඩ පොහොර ප්රමිතියෙන් තොර බව ගොවීන් චෝදනා කර ඇත.
සපයනු ලබන පොහොර මලුවල නිෂ්පාදන නාමය, නිෂ්පාදන දිනය හෝ කල් ඉකුත් වීමේ දිනය සඳහන් නොවන බවත් ඒවා කුඹුරුවල භාවිත කළ නොහැකි බවත් ගොවීහු තවදුරටත් කියා සිටිති.
