විදේශ කටයුතු අමාත්‍යාංශයේ මාධ්‍ය අධ්‍යක්ෂ ජනරාල් තුෂාර රොද්‍රිගෝ මහතා සඳහන් කර ඇත්තේ, ශ්‍රී ලංකාවේ සුවිශේෂී ආර්ථික කලාපය ආසන්නයේ නැංගුරම්ලා ඇති බවට වාර්තා වන නෞකා සම්බන්ධයෙන් රජය අවධානයෙන් පසුවන බවයි.

කෙසේවෙතත්, මෙම නෞකා ශ්‍රී ලංකාවේ ස්වෛරී මුහුදු සීමාවෙන් පිටත ස්ථානගත කර ඇති බැවින්, ඒ සම්බන්ධයෙන් ශ්‍රී ලංකාවට කිසිදු වගකීමක් නොමැති බවත්, එම නෞකාවලට ශ්‍රී ලංකාව කිසිදු පහසුකමක් ලබා නොදෙන බවත් ඔහු අවධාරණය කර තිබේ.

TankerTrackers වෙබ් අඩවියට අනුව, ඉරාන තෙල් නෞකා 20කට ආසන්න සංඛ්‍යාවක් මේ වනවිට ශ්‍රී ලංකාවේ සුවිශේෂී ආර්ථික කලාපය ආසන්නයේ නැංගුරම්ලා තිබේ.

ඇමරිකා එක්සත් ජනපදය විසින් පනවා ඇති නාවික අවහිරතාවක් හේතුවෙන් මෙම නෞකාවලට සිය මව් රට වන ඉරානයේ වරායන් වෙත යාත්‍රා කිරීමට නොහැකි වී ඇති බව වාර්තා වේ.

ඒ අනුව, ඉරාන ධජය යටතේ ක්‍රියාත්මක වන තෙල් නෞකා 13ක් පමණ සහ සම්බාධක මගහරිමින් ක්‍රියාත්මක වන නෞකා කිහිපයක් ඇතුළත් වන ‘සෙවණැලි නෞකා බලඇණිය’ (Shadow Fleet) ලෙස හැඳින්වෙන නෞකා දැනට ශ්‍රී ලංකාවේ සුවිශේෂී ආර්ථික කලාපය ආසන්නයේ ආරක්ෂාව අපේක්ෂාවෙන් නැංගුරම්ලා ඇති බව එම වෙබ් අඩවිය පවසයි.

කෙසේවෙතත්, මෙම නෞකා මේ වනවිට ඉන්ධන රැගෙන නොයන බවද TankerTrackers සඳහන් කරයි.

එමෙන්ම, පසුගිය මාර්තු මාසයේදී ශ්‍රී ලංකාවේ වෙරළේ සිට නාවික සැතපුම් 19ක් පමණ දුරින් IRIS Dena නෞකාව ඇමරිකානු සබ්මැරීනයක් විසින් ප්‍රහාරයට ලක් කර ගිල්වා දැමූ බවට වාර්තා වූ සිදුවීමද සිහිපත් කරමින්, ශ්‍රී ලංකාව ආසන්නයේ නැංගුරම්ලා ඇති මෙම නෞකා ප්‍රහාරවලට ලක්වීමේ අවදානමක් පවතින බව TankerTrackers පෙන්වාදෙයි.

කෙසේවෙතත්, අන්තර්ජාතික නීතිය යටතේ මධ්‍යස්ථ රටක භෞමික මුහුදු සීමාව තුළ පිහිටි නෞකා වෙත ඇමරිකා එක්සත් ජනපදයට ප්‍රහාර එල්ල කිරීමට අවසර නොමැති බවද එම වෙබ් අඩවිය සඳහන් කරයි.

රටක භෞමික මුහුදු සීමාව එරට වෙරළ තීරයේ සිට නාවික සැතපුම් 12ක් දක්වා විහිදෙන බවද එහි වැඩිදුරටත් සඳහන් වේ.