July 12, 2026
බලහත්කාර ශ්රමය යොදවාගෙන කැණීම් කරන ලද, නිෂ්පාදනය කරන ලද හෝ සකස් කරන ලද කිසිදු භාණ්ඩයක් මෙරටට ආනයනය කිරීම රජය විසින් සම්පූර්ණයෙන්ම තහනම් කර තිබේ.
ඇමරිකා එක්සත් ජනපදය විසින් ශ්රී ලංකාවට පනවන ලද සියයට 12.5ක නව ආනයනික බද්දක් හේතුවෙන් රජය මෙම දැඩි තීරණය ගෙන ඇත.
ජනාධිපති අනුර කුමාර දිසානායක විසින් පසුගිය සිකුරාදා අත්සන් කරන ලද විශේෂ ගැසට් නිවේදනයක් මඟින් මේ බව ප්රකාශයට පත්කර තිබේ.
ඒ අනුව, තමන් ආනයනය කිරීමට බලාපොරොත්තු වන භාණ්ඩ සම්පූර්ණයෙන්ම හෝ අර්ධ වශයෙන් බලහත්කාර ශ්රමය භාවිත කරමින් නිෂ්පාදනය කළ ඒවා නොවන බව තහවුරු කිරීම සඳහා ආනයනකරුවන් විසින් රේගු අධ්යක්ෂ ජනරාල්වරයාගෙන් සහතික පත්ර ලේඛන ලබාගත යුතු වේ.
බලහත්කාර ශ්රමයෙන් නිපදවන භාණ්ඩ ආනයනය තහනම් කිරීමට අපොහොසත් වීම හේතුවෙන්, ඇමරිකාව විසින් නව ආනයන බද්දක් පැනවූ රටවල් 60ක ලැයිස්තුවට ශ්රී ලංකාව ද ඇතුළත් කර තිබිණි.
මේ සම්බන්ධයෙන් වන සවිස්තරාත්මක වාර්තාවක් එක්සත් ජනපද වෙළඳ නියෝජිත කාර්යාලය විසින් ජූනි 02 වැනිදා ප්රකාශයට පත්කරන ලදී.
ශ්රී ලංකාව මෙවැනි ආනයන තහනමක් පැනවීමට සහ එය ඵලදායී ලෙස බලාත්මක කිරීමට අපොහොසත් වීම අසාධාරණ බවත්, එමඟින් ඇමරිකානු වාණිජ කටයුතුවලට බාධාවක් හෝ සීමාවක් ඇති කරන බවත් එම වාර්තාවෙන් පෙන්වා දී තිබේ.
විශේෂයෙන්ම, ඇමරිකාව යනු නිමි කපු සහ කපු මිශ්ර රෙදිපිළි මෙන්ම ඇඟලුම් පරිභෝජනය කරන ප්රධාන රටක් වන අතර, මෙම වාර්තාව මඟින් ‘උයිගර් බලහත්කාර ශ්රම වැළැක්වීමේ පනත’ යටතට වැටෙන කපු පිළිබඳව ද අවධානය යොමුකර ඇත.
එම පනත මඟින් උතුරු කොරියානු ශ්රමිකයන් හෝ චීනයේ ෂින්ජියැන්ග් උයිගර් ස්වාධීන කලාපය තුළ සම්පූර්ණයෙන්ම හෝ අර්ධ වශයෙන් නිෂ්පාදනය කරන භාණ්ඩ ඇමරිකාවට ඇතුළු කිරීම තහනම් කර තිබේ.
මෙම විමර්ශනයට භාජනය වූ ශ්රී ලංකාව ඇතුළු ආර්ථිකයන් දහයක පවතින, චීනයට සම්බන්ධ අතරමැදි නිෂ්පාදකයන් පිළිබඳ සිද්ධි අධ්යයනයන් ද එම ඇමරිකානු වාර්තාවේ සවිස්තරාත්මකව ඇතුළත් කර ඇත.
