September 1, 2026
යෝජිත 22 වැනි ආණ්ඩුක්රම ව්යවස්ථා සංශෝධනය මගින් පළපුරුදු විනිසුරුවන් සේවයේ රඳවා ගැනීම අරමුණු කර ඇති බවට ආණ්ඩුව දක්වන තර්කය පිවිතුරු හෙළ උරුමයේ නායක උදය ගම්මන්පිල ප්රශ්න කළේය. ඒ සඳහා ඔහු පෙන්වාදෙන්නේ අදාළ පනත් කෙටුම්පතට එරෙහි පෙත්සම් විභාග කිරීම සඳහා පත්කරන ලද පංචපුද්ගල ශ්රේෂ්ඨාධිකරණ විනිසුරු මඬුල්ලේ ස්වභාවයයි.
අග්විනිසුරු ප්රීති පද්මන් සූරසේනගේ ප්රධානත්වයෙන් යුත් පංචපුද්ගල විනිසුරු මඬුල්ලක් හමුවේ 22 වැනි සංශෝධනයට එරෙහි පෙත්සම් සලකා බැලීම අද ආරම්භ විය. අචල වෙංගප්පුලි, අර්ජුන ඔබේසේකර, සම්පත් අබේකෝන් සහ ගිහාන් කුලතුංග මෙම විනිසුරු මඬුල්ලේ සසුන් ගන්නා අනෙකුත් විනිසුරුවරුන් වේ.
නඩු විභාගයෙන් අනතුරුව ජනමාධ්ය වෙත අදහස් දක්වමින් උදය ගම්මන්පිල කියාසිටියේ, විනිසුරුවරුන්ගේ විශ්රාම යෑමේ වයස දීර්ඝ කිරීම ජ්යෙෂ්ඨ අධිකරණ පළපුරුද්ද රඳවාගැනීම සඳහා අත්යවශ්ය බවට ආණ්ඩුව ප්රසිද්ධියේ ගෙනහැර දක්වන තර්කය පිළිබඳව මෙම විනිසුරු මඬුල්ලේ සංයුතියෙන්ම ප්රශ්න මතුවන බවයි.
ශ්රේෂ්ඨාධිකරණයේ වඩාත්ම ජ්යෙෂ්ඨ විනිසුරුවරුන් කිහිපදෙනෙකු මෙම පංචපුද්ගල විනිසුරු මඬුල්ලට ඇතුළත් කර නොමැති අතර, වඩාත්ම කණිෂ්ඨ විනිසුරුවරයකු ඊට පත්කර ඇති බව ඔහු පැවසීය.
“ජ්යෙෂ්ඨ පළපුරුද්දක් ඇති විනිසුරුවරුන් තවත් වසර දෙකක් සේවයේ රඳවා ගතයුතු නිසා 22 වැනි සංශෝධනය අත්යවශ්ය බව ආණ්ඩුව දිගින් දිගටම තර්ක කළා” යැයි උදය ගම්මන්පිල සඳහන් කළේය.
කෙසේවෙතත්, මෙවැනි වැදගත් ආණ්ඩුක්රම ව්යවස්ථාමය තීරණයක් සඳහා විනිසුරු මඬුල්ලක් පත්කිරීමේදී ජ්යෙෂ්ඨත්වය සහ අමතර සේවා කාලයේ පළපුරුද්ද තීරණාත්මක සාධකයක් නොවන බව මෙම විනිසුරු මඬුල්ල තේරීම හරහා පෙන්නුම් කරන බව ඔහු ප්රකාශ කළේය.
අගවිනිසුරුවරයා විසින් එවැනි ප්රකාශයක් සිදුකර නොමැති වුවද, උදය ගම්මන්පිල මෙය හැඳින්වූයේ ආණ්ඩුවේ තර්කයට එල්ල වූ “ටොක්කක්” ලෙසය.
