වාහන ආනයනය සඳහා පනවා තිබූ තාවකාලික තහනම ඉවත් කිරීම සම්බන්ධයෙන් ඊයේ නිකුත් කරන ලද ගැසට් පත්‍රය අදාළ වන්නේ වාහන කාණ්ඩ හතරකට පමණක් බව වාහන ආනයනකරුවන්ගේ සංගමය පවසයි.

මාධ්‍ය වෙත අදහස් දක්වමින් සංගමයේ සභාපති ප්‍රසාද් මානගේ පැවසුවේ ගැසට් පත්‍රය මඟින් ආසන 25කට වැඩි බස් රථ, ආසන 10 සිට 16 දක්වා මගී ප්‍රවාහන වෑන් රථ, ද්විත්ව කැබ් රථ සහ ලොරි ආනයනය කිරීමට අවසර ලබා දී ඇති බවයි.

මෙම වාහන ආනයනය සඳහා වන තීරුබදු ව්‍යුහයන් තවමත් ප්‍රකාශයට පත් කර නොමැති බවත්, අදාළ චක්‍රලේඛය අද හෝ ඉදිරි දිනවලදී නිකුත් කරනු ඇතැයි අපේක්ෂා කරන බවත් ප්‍රසාද් මානගේ තවදුරටත් පැවසීය.

කෙසේවෙතත්, පෞද්ගලික භාවිතය සඳහා වාහන ආනයනය සඳහා ගැසට් පත්‍රය අදාළ නොවන බව පැහැදිලි කරමින්, ඊට අදාළ නිවේදනය ඉක්මණින් නිකුත් කරනු ඇතැයි ඔහු විශ්වාසය පළ කළේය.

මුදල්, සැලසුම් සහ ආර්ථික සංවර්ධන අමාත්‍යාංශය ඊයේ දින 1969 අංක 1 දරන ආනයන හා අපනයන (පාලන) පනත යටතේ නව රෙගුලාසි නිකුත් කළේය.

2025 අංක 01 දරන ආනයන හා අපනයන (පාලන) රෙගුලාසි ලෙස හඳුන්වන මෙම රෙගුලාසි, මෝටර් රථ ආනයනය සඳහා තාවකාලිකව පනවා ඇති අත්හිටුවීම ඉවත් කිරීමට පහසුකම් සැලසීම අරමුණු කරයි.