අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනුකරන ලද දූෂණ චෝදනාවකට වරදකරු වීමෙන් අනතුරුව හිටපු සිවිල් ගුවන් සේවා අමාත්‍ය පියංකර ජයරත්නට වසර හතක බරපතල වැඩ සහිත සිරදඬුවම් නියම කර ඇත.

දීර්ඝ නඩු විභාගයකින් අනතුරුව කොළඹ මහාධිකරණ විනිසුරු මොහොමඩ් මිහාල් විසින් මෙම සිරදඬුවම නියම කරන ලදී.

2014 වසරේ පවත්වන ලද එක්සත් ජනතා නිදහස් සන්ධාන මැයි දින රැලියට සහභාගී වූ දේශපාලන ආධාරකරුවන්ට ආහාර පාන සැපයීම වෙනුවෙන් මාරවිල ප්‍රදේශයේ පෞද්ගලික ආයතනයකට, රජයට අයත් ශ්‍රීලංකන් කේටරින් සමාගමේ ගිණුම්වලින් රුපියල් 330,000ක මුදලක් ගෙවීමේ සිද්ධියකට අදාළව මෙම නඩුව පවරා තිබිණි.

අධිචෝදනා පත්‍රයට අනුව, එවකට සිවිල් ගුවන් සේවා අමාත්‍යවරයා ලෙස කටයුතු කළ පියංකර ජයරත්න විසින් අදාළ ආහාර සංවිධාන කටයුතු වෙනුවෙන් එම ගෙවීම සිදුකරන ලෙස ශ්‍රීලංකන් කේටරින් සමාගමේ විධායක නිලධාරියකුට බලපෑම් කර තිබේ.

මෙම ගනුදෙනුව සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් හිටපු අමාත්‍යවරයාට එරෙහිව කොළඹ මහාධිකරණය හමුවේ මෙලෙස අධිචෝදනා පත්‍ර ගොනුකර තිබිණි.