2024 ලංකා ප්‍රිමියර් ලීග් (LPL) තරගාවලියට සහභාගී වූ ක්‍රිකට් ක්‍රීඩකයකුට තරඟ පාවාදීමේ නිරතවීමට බලපෑම් කිරීම සම්බන්ධයෙන් වරද පිළිගත් ‘දඹුල්ල තන්ඩර්ස්’ කණ්ඩායමේ හිටපු හිමිකරු වන තමීම් රහ්මාන්ට අද (28) දඩ නියම කර අත්හිටවූ සිරදඬුවමක් නියම කරන ලදී.

ඒ අනුව, කොළඹ මහාධිකරණය විත්තිකරුට රුපියල් මිලියන 24 ක දඩයක් නියම කළ අතර, ඔහුට වසර හතරක බරපතල සිර දඬුවමක් නියම කරන ලද අතර, එම දඬුවම වසර 5 කට අත්හිටුවන ලදී.

බ්‍රිතාන්‍ය පුරවැසිභාවය ඇති බංග්ලාදේශ ජාතික රහ්මාන්, තරඟ පාවාදීමේ චෝදනා සම්බන්ධයෙන් ක්‍රීඩා අමාත්‍යාංශයේ විශේෂ විමර්ශන ඒකකයේ නිලධාරීන් විසින් 2024 මැයි 22 වැනි දින කටුනායක බණ්ඩාරනායක අන්තර්ජාතික ගුවන්තොටුපළේදී අත්අඩංගුවට ගන්නා ලදී.

2024 LPL තරගාවලියට සහභාගී වූ ක්‍රිකට් ක්‍රීඩකයකුට තරඟ පාවාදීමේ නිරතවීමට බලපෑම් කිරීම සම්බන්ධයෙන්, ක්‍රීඩා සම්බන්ධ වැරදි වැළැක්වීමේ පනත යටතේ ඔහුට පසුගිය වසරේ නොවැම්බර් මාසයේදී කොළඹ මහාධිකරණය හමුවේ අධිචෝදනා ගොනුකරන ලදී.

පසුව ඔහු චෝදනාවලට වරද පිළිගෙන ඇප මත නිදහස් විය.

මෙම නඩුව මීට පෙර කොළඹ මහාධිකරණ විනිසුරු උදේෂ් රණතුංග ඉදිරියේ විභාගයට ගත් අවස්ථාවේදී, විත්තිකරු වෙනුවෙන් පෙනීසිටි ජනාධිපති නීතිඥ කාලිංග ඉන්දතිස්ස අධිකරණයට දන්වා සිටියේ තම සේවාදායකයා නඩුව කඩිනමින් අවසන් කිරීමට සූදානම් බවත් මේ සම්බන්ධයෙන් නීතිපතිවරයාට කරුණු ඉදිරිපත් කර ඇති බවත්ය.

ඒ අනුව, අද මෙම නඩුව කැඳවූ විට, අදාළ චෝදනාවලට වරද පිළිගන්නා බව විත්තිකරු අධිකරණයට දැනුම් දුන්නේය.

ඒ අනුව, විනිසුරුවරයා ඔහුට ඉහත සඳහන් දඬුවම නියම කළේය.