බිම් මට්ටමේ පාපන්දු ක්‍රීඩාව සඳහා සන්ධිස්ථානයක් සනිටුහන් කරමින් ශ්‍රී ලංකා පාපන්දු සම්මේලනය නව ‘FIFA Arena’ කුඩා තණතීරුවක් සඳහා මීගමුවේදී පසුගිය සෙනසුරාදා මුල්ගල තැබීය.

මෙම ව්‍යාපෘතිය ක්‍රීඩාවේ අන්තර්ජාතික පාලක මණ්ඩලය වන FIFA විසින් දියත් කරන ලද ගෝලීය වැඩසටහනක කොටසකි.

මේ යටතේ ඉදිරි වසර දෙක තුළ ලොව පුරා කුඩා තණතීරු 1,000කට වඩා ස්ථාපනය කිරීම අරමුණු කර තිබේ.

වැඩසටහනේ නියමු අදියර සඳහා තෝරාගත් ආසියානු රටවල් තුනෙන් එකක් ශ්‍රී ලංකාවයි.

මෙම යෝජනා ක්‍රමය යටතේ ශ්‍රී ලංකාවට තණතීරු දෙකක් වෙන් කර ඇත.

ඒ අනුව එක තණතීරුවක් කෝට්ටේ සහ අනෙක මීගමුවේ ස්ථාපනය කෙරේ.

ක්‍රීඩා හා තරුණ කටයුතු නියෝජ්‍ය අමාත්‍ය සුගත් තිලකරත්න විසින් මීගමුව තණතීරුව සඳහා නිල වශයෙන් මුල්ගල් තැබීය.

ශ්‍රී ලංකා පාපන්දු සම්මේලන සභාපති ජස්වර් උමාර්, මීගමුව නගරාධිපති සහ විවිධ පාර්ලිමේන්තු මන්ත්‍රීවරුන් උත්සවයට සහභාගී වූහ.

“මෙම පහසුකම ක්‍රීඩාවට වඩා වැඩි යමක් ගැනයි. එය අඩු වරප්‍රසාද ලත් දරුවන්ට සහ සිසුන්ට ක්‍රීඩාව සංවර්ධනය කර ගැනීම සඳහා ආරක්ෂිත, නවීන පරිසරයක් ලබා දීම ගැනයි,” ශ්‍රී ලංකා පාපන්දු සම්මේලනය නිවේදනයක් නිකුත් කරමින් කියා සිටියේය.

ක්‍රීඩාංගණය සෞඛ්‍ය සම්පන්න ජීවන රටාවන් සහ විනය ප්‍රවර්ධනය කිරීම සඳහා ප්‍රජා මධ්‍යස්ථානයක් ලෙස සේවය කරනු ඇති බවටත් විශේෂයෙන් නායකත්වය සහ ක්‍රීඩාශීලීත්වය පෝෂණය කිරීමෙන් දේශීය තරුණයන් අතර මත්ද්‍රව්‍යවලට ඇබ්බැහි වීම වැළැකී යනු ඇති බවටත් බලධාරීන් බලාපොරොත්තු වේ.

ඉදිකිරීම් කඩිනම් කර මාර්තු මාසයේදී නිම කිරීමට දින නියම කර ඇත.

ඉදිකිරීම් අවසන් වූ පසු, මීගමුව සහ ඒ අවට ප්‍රදේශවල දරුවන්ට දිගුකාලීන සම්පතක් ලබා දෙමින් ක්‍රීඩාංගණය මහජනතාවට භාර දෙනු ඇත.