වවුනියාවේ කූමාන්කුලම් හිදී යතුරුපැදිකරුවකු මිය යෑමෙන් පසු පොලිසිය සහ ප්‍රදේශවාසීන් කිහිප දෙනෙකු අතර ඇති වූ ගැටුමකින් පොලිස් නිලධාරීන් පස් දෙනෙකු තුවාල ලැබූ සිද්ධියක් සම්බන්ධයෙන් පරීක්ෂණ ආරම්භ වී තිබේ.

පොලිසියට අනුව, නෙලුක්කුලම් පොලිස් ස්ථානයේ රථවාහන පොලිස් නිලධාරීන් දෙදෙනෙකු ප්‍රදේශයේ කෝවිලක් අසල යතුරුපැදිකරුවකු වැටී සිටින බවට ලැබුණු වාර්තාවකට අනුව එහි ගොස් ඇත.

කෙසේවෙතත්, නිලධාරීන් එම ස්ථානයට පැමිණි විට අසල මත්පැන් අලෙවිසැලක සිටි පුද්ගලයන් කිහිප දෙනෙකු සමඟ ආරවුලක පැටලී තිබේ.

මියගිය යතුරුපැදිකරු පොලිසිය ලුහුබඳින අතරතුර අනතුරකින් මිය ගොස් ඇති බවට ඔවුන් චෝදනා කර තිබිණි.

පොලිස් නිලධාරීන් දෙදෙනාට පුද්ගලයන් කිහිප දෙනෙකු විසින් පහර දී ඇති අතර, තත්ත්වය පාලනය කිරීම සඳහා නෙලුක්කුලම් පොලිසිය විසින් යවන ලද තවත් නිලධාරීන් පස් දෙනෙකුට ද එම පුද්ගලයන් පහර දී ඇති බව කියනු ලැබේ.

තුවාල ලැබූ නිලධාරීන් මැදවච්චිය රෝහලට ඇතුළත් කර තිබිණි.

අවසානයේ විශේෂ කාර්ය සාධක බලකාය සහ පොලිස් කැරලි මර්දන ඒකකයේ නිලධාරීන් යෙදවීමෙන් තත්ත්වය පාලනය කරන ලදී.

මියගිය යතුරුපැදිකරුගේ දේහය වවුනියාව රෝහලට ගෙන ගොස් ඇති අතර අධිකරණ නියෝගයක් ලැබුණු පසු මරණය සම්බන්ධයෙන් පශ්චාත් මරණ පරීක්ෂණය පවත්වනු ඇත.