‘Clean Sri Lanka’ වැඩසටහන යටතේ පළමු ඝන අපද්‍රව්‍ය ප්‍රතිචක්‍රීකරණ මධ්‍යස්ථානය නැගෙනහිර වෙරළ තීරයේ කාත්තන්කුඩි ප්‍රදේශයේ ආරම්භ කර ඇත.

‘Clean Sri Lanka’ වැඩසටහනට සමගාමීව, රාජ්‍ය පරිපාලන, පළාත් සභා සහ පළාත් පාලන අමාත්‍යාංශය මගින් පළාත් පාලන ආයතන තුළ ප්‍රතිචක්‍රීකරණ මධ්‍යස්ථාන පිහිටුවීමේ වැඩසටහනක් දියත් කර තිබේ.

ජනාධිපති කාර්යාලයට අනුව, මෙම මධ්‍යස්ථාන මගින් ඝන අපද්‍රව්‍ය නැවත භාවිත කළ හැකි ද්‍රව්‍ය බවට පරිවර්තනය කිරීම සඳහා පහසුකම් සපයන අතර පළාත් නවයම ආවරණය වන පරිදි ප්‍රතිචක්‍රීකරණ මධ්‍යස්ථාන පිහිටුවීමට සැලසුම් කර ඇත.

එහි පළමු පියවර ලෙස පළමු පියවර ලෙස, රුපියල් මිලියන 50.8 ක වියදමින් කාත්තන්කුඩි නගර සභාවේ ප්‍රතිචක්‍රීකරණ මධ්‍යස්ථානයේ කටයුතු ඊයේ ආරම්භ කරන ලදී.

වැඩසටහන සඳහා මුළු ස්ථාන 54 ක් හඳුනාගෙන ඇති අතර ඊට සෑම පළාතකම දිරාපත් නොවන අපද්‍රව්‍ය සැලකිය යුතු ප්‍රමාණයක් ජනනය වන ස්ථාන හයක් බැගින් ඇතුළත් වේ.

මෙම ස්ථාන 25 ආශ්‍රිතව දැනටමත් ශක්‍යතා අධ්‍යයනයන් සිදුකර ඇත.

ඉදිරි වසර තුන තුළ ගොඩකිරීම් සඳහා යවන අපද්‍රව්‍ය ප්‍රමාණය 30% කින් අඩු කිරීම ව්‍යාපෘතියේ අරමුණයි.

3R සංකල්පය (අඩු කිරීම, නැවත භාවිත කිරීම, ප්‍රතිචක්‍රීකරණය) ක්‍රියාත්මක කිරීමේදී ප්‍රජා දැනුවත්භාවය සහ සහභාගීත්වය ප්‍රවර්ධනය කිරීම, සමස්ත අපද්‍රව්‍ය උත්පාදනය අඩුකිරීම සහ පොලිතින්, වීදුරු සහ අනෙකුත් ද්‍රව්‍ය වැනි නිසි ලෙස වෙන්කරන ලද අපද්‍රව්‍ය එකතු කර කළමනාකරණය කිරීම සඳහා පළාත් පාලන ආයතන ශක්තිමත් කිරීම මගින් එය ක්‍රියාත්මක කෙරේ.

ආරක්ෂක අමාත්‍යාංශය, ත්‍රිවිධ හමුදාව, සිවිල් ආරක්ෂක දෙපාර්තමේන්තුව, ශ්‍රී ලංකා මහවැලි අධිකාරිය, ස්වේච්ඡා සංවිධාන, පාරිසරික කණ්ඩායම් සහ ජනතාවගේ සහය ලබා ගනිමින් සහභාගීත්වයෙන් ‘Clean Sri Lanka’ ලේකම් කාර්යාලය විසින් මෙම වැඩසටහන සම්බන්ධීකරණය කරයි.