මූල්‍ය වංචා සම්බන්ධයෙන් සිදුවෙමින් පවතින පරීක්ෂණ සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් තම නිවසට පැමිණ ඇති බවට පළ වන ජනමාධ්‍ය වාර්තා විශ්‍රාමික නියෝජ්‍ය පොලිස්පති (DIG) රොහාන් ප්‍රේමරත්න ප්‍රතික්ෂේප කර තිබේ.

විශ්‍රාමික නියෝජ්‍ය පොලිස්පති රොහාන් ප්‍රේමරත්න රුපියල් මිලියන 7.5 ක මූල්‍ය වංචාවක් සම්බන්ධයෙන් විමර්ශනයකට ලක්ව සිටී.

අල්ලස් නිලධාරීන් තම නිවස ඇතුළු, තමන් නැවතී සිටි ස්ථාන කිහිපයක් සෝදිසි කළ බවට පළ වන ජනමාධ්‍ය වාර්තාවලට ප්‍රතිචාර දක්වමින් විශ්‍රාමික නියෝජ්‍ය පොලිස්පති ප්‍රේමරත්න පැවසුවේ, ඔහු තවමත් ඔහුගේ සුපුරුදු නිවසේ පදිංචිව සිටින බවයි.

2021 දී රොහාන් ප්‍රේමරත්න අපරාධ පරීක්ෂණ දෙපාර්තමේන්තුව (CID) භාර නියෝජ්‍ය පොලිස්පතිවරයා ලෙස සේවය කරමින් සිටියදී, නයිජීරියානු ජාතිකයන් පිරිසක් දෙහිවලදී අත්අඩංගුවට ගන්නා ලදී.

එම කණ්ඩායම සතුව පැවැති බව පැවසෙන රුපියල් මිලියන 7.5 ක නීතිවිරෝධී මුදලක් අවභාවිත කිරීම සම්බන්ධයෙන් නියෝජ්‍ය පොලිස්පතිවරයාට චෝදනා එල්ලවී ඇත.

එම මුදල ඇති ස්ථානය සම්බන්ධයෙන් පරීක්ෂණයක් සිදුවෙමින් පවතී.