මිල්ලනිය ප්‍රාදේශීය සභාවේ සභාපති සමන් සුජීව ජයතුංග වෙත නිර්නාමික දුරකථන ඇමතුමක් හරහා මරණ තර්ජන එල්ල වී ඇති බවට ලද පැමිණිල්ලක් මත හොරණ මූලස්ථාන පොලිසිය විමර්ශනයක් ආරම්භ කර තිබේ.

පොලිසිය පවසන පරිදි, අද (15) අලුයම 1.00 ට පමණ හඳුනානොගත් පුද්ගලයකු විසින් සභාපතිවරයාගේ ජංගම දුරකථනයට ඇමතුමක් ලබා දී, අලුයම උදාවීමට පෙර ඔහුව ඝාතනය කරන බවට මෙලෙස තර්ජනය කර ඇත.

මෙම තර්ජනයත් සමඟ සභාපතිවරයා වහාම පොලිස් හදිසි ඇමතුම් අංකය වෙත දැනුම් දී ඇති අතර, ඒ අනුව හොරණ මූලස්ථාන පොලිසියේ නිලධාරීන් කණ්ඩායමක් ඔහුගේ නිවසට ගොස් වශයෙන් පැමිණිල්ල සටහන් කරගෙන තිබේ.

අදාළ දුරකථන අංකය සහ ඇමතුම් වාර්තා පරීක්ෂා කරමින් මෙම ඇමතුම පිටුපස සිටින පුද්ගලයා කවුරුන්දැයි හඳුනාගැනීම සඳහා මේ වන විට තාක්ෂණික විමර්ශන ක්‍රියාත්මක බව පොලිසිය සඳහන් කරයි.

ප්‍රාදේශීය සභා සභාපතිවරයාගේ ආරක්ෂාව තහවුරු කිරීමට මේ වන විට පියවර ගෙන ඇති අතර, හොරණ මූලස්ථාන පොලිසිය සිද්ධිය සම්බන්ධයෙන් වැඩිදුර විමර්ශන සිදුකරනු ලබයි.