ඕස්ට්‍රේලියානු නීතියට අනුව අනුමත මත්පැන් ප්‍රමාණය මෙන් දෙගුණයකටත් වඩා වැඩි ප්‍රමාණයක් ශරීරගතව තිබියදී රථයක් ධාවනය කිරීම (බීමත්ව රිය පැදවීම) සම්බන්ධයෙන් හිටපු ඕස්ට්‍රේලියානු ක්‍රිකට් ක්‍රීඩක ඩේවිඩ් වෝනර් වරදකරු වී ඇති අතර, ඔහුට ඕස්ට්‍රේලියානු ඩොලර් 1,500ක දඩයක් නියම කර තිබේ.

අප්‍රේල් මාසයේ පාස්කු සතිඅන්තයේ සිදු වූ මෙම සිදුවීමට අදාළව 39 හැවිරිදි වෝනර් අඟහරුවාදා සිඩ්නි නුවර වේවර්ලි ප්‍රාදේශීය අධිකරණය හමුවේ තමන් වරදකරු බව පිළිගත්තේය.

සිඩ්නි නුවර නැගෙනහිර ප්‍රදේශයේ පැවැති සාදයක සිට තම පවුලේ අය සමඟ ආපසු නිවස බලා රථය පදවාගෙන එමින් සිටියදී වෝනර් මාර්ගයේ තිබූ හදිසි මත්පැන් පරීක්ෂණ ස්ථානයකට මුහුණ දී ඇත.

එම පරීක්ෂණ ස්ථානය දැකීමෙන් පසු වෝනර් සිය රථය නවත්වා, පොලිසිය පැමිණීමට පෙර රථයේ සිටි කාන්තා මගියකු සමඟ අසුන මාරුකර ගැනීමට උත්සාහ කළ බව අධිකරණයේදී අනාවරණය විය.

පසුව කරන ලද පරීක්ෂණයේදී ඔහුගේ රුධිරයේ මත්පැන් මට්ටම 0.104ක් ලෙස සටහන් වූ අතර, එය නීතිමය සීමාව වන 0.05 මෙන් දෙගුණයකටත් වඩා වැඩිය. එම අවස්ථාවේදී වාහනය තුළ කුඩා ළමයින් ද සිටි බැවින් මෙම වරද වඩාත් බරපතල එකක් ලෙස සලකා බලන ලදී.

විනිසුරු ක්ලෙයාර් ෆානන් විසින් වෝනර් වරදකරු කරමින් ඕස්ට්‍රේලියානු ඩොලර් 1,500ක දඩයක් නියම කළාය. මීට අමතරව මාස 12ක කාලයක් සඳහා සිය රථයේ ‘ඇල්කොහොල් ඉන්ටර්ලොක්’ (Alcohol Interlock) උපාංගයක් භාවිත කිරීමට ද ඔහුට නියම විය. මෙම උපාංගය මඟින් රියදුරාගේ හුස්මෙහි මත්පැන් අඩංගු බව හඳුනාගතහොත් වාහනය පණගැන්වීම වළක්වනු ලබයි.

හිටපු ඕස්ට්‍රේලියානු ආරම්භක පිතිකරු දැනටමත් දැඩි මහජන විවේචනයට ලක්ව ඇති බවත්, මෙම සිදුවීම ඔහුගේ වාණිජමය අවස්ථාවන්ට බලපෑ හැකි බවත් පවසමින් වෝනර්ව වරදකරුවෙකු නොකර මෙම නඩුව අවසන් කරන ලෙස ඔහුගේ නීතිඥවරයා ඉල්ලා සිටියේය.

කෙසේවෙතත්, බීමත්ව රිය පැදවීම වැළැක්වීමේ අවශ්‍යතාව අධිකරණය මෙහිදී අවධාරණය කළ අතර, වෝනර් නැවත මෙවැනි වරදක් කිරීමට ඉඩක් නොමැති බව පිළිගන්නා බව ද විනිසුරුවරිය පැවසුවාය.

වෝනර් ඕස්ට්‍රේලියාව වෙනුවෙන් ටෙස්ට් තරග 112කට සහ සීමිත ඕවර අන්තර්ජාතික තරග 250කට වැඩි සංඛ්‍යාවකට ක්‍රීඩාකර ඇත. ඔහු දැනට ක්‍රිකට් විචාරකයකු ලෙස කටයුතු කරන අතර බිග් බෑෂ් ලීග් තරගාවලියේ ‘සිඩ්නි තන්ඩර්’ කණ්ඩායමේ නායකත්වය ද දරයි.