ඉන්දීය අග්‍රාමාත්‍ය නරේන්ද්‍ර මෝදි විසින් ඔහුගේ ඉකුත් ශ්‍රී ලංකා සංචාරයේදී විවෘත කරන ලද දඹුල්ල ප්‍රදේශයේ උෂ්ණත්වය හා ආර්ද්‍රතාවය පාලනය කළහැකි කෘෂිකාර්මික ගබඩා සංකීර්ණයේ මෙහෙයුම් ආරම්භවීමට පෙර රුපියල් 8,409,000 විදුලි බිලක් ලැබී ඇතැයි අනාවරණ වී තිබේ.

හිටපු පාර්ලිමේන්තු මන්ත්‍රීවරුන් ඇතුළු දේශපාලනඥයන් පිරිසක් එම ස්ථානයේ සිදුකළ නිරීක්ෂණ චාරිකාවක දී මෙම අනාවරණය සිදුකර ඇත.

එම විදුලි බිල්පත නොගෙවීම හේතුවෙන් එම ගබඩාවේ විදුලි සැපයුම විසන්ධි කර ඇති බව ද අනාවරණ විය.

පාර්ලිමේන්තු මන්ත්‍රී හර්ෂ ද සිල්වාගේ යෝජනාවකට අනුව මීට වසර කිහිපයකට පෙර ඉන්දීය රජයේ ආධාර මත මෙම ගබඩා සංකීර්ණය ඉදිකර ඇත.

ජනාධිපති අනුර කුමාර දිසානායකගේ ආරාධනයෙන් මෙරටට පැමිණි ඉන්දීය අග්‍රාමාත්‍ය නරේන්ද්‍ර මෝදි විසින් අප්‍රේල් 05 වැනි දින නිල සමාරම්භක උත්සවයකදී දුරස්ථ උත්සවයකදී එම ගබඩා සංකීර්ණය උත්සවාකාරයෙන් විවෘත කළේය.

කෙසේවෙතත් මේ දක්වා එහි මෙහෙයුම් කටයුතු සිදුනොවීම හේතුවෙන් හිටපු පාර්ලිමේන්තු මන්ත්‍රීවරුන් වන උදය ගම්මන්පිල, සංජීව එදිරිමාන්න, ප්‍රේම්නාත් සී. දොළවත්ත, සුගීෂ්වර බණ්ඩාර, නිමල් පියතිස්ස, දඹුල්ල හිටපු නගරාධිපති ජාලිය ඕපාත ඇතුළු පිරිසක් එම ස්ථානයට පැමිණ එම ගබඩා සංකිර්ණයේ වත්මන් තත්වය පිළිබඳව සොයාබලා තිබේ.

එම අවස්ථාවේදී ගබඩාවේ ගේට්ටු වසාදමා තිබෙනු දක්නට ලැබුණු අතර, පසුව එහි මුරකරු සම්බන්ධ කරගනිමින් හිටපු මන්ත්‍රීවරුන් පිරිස ගබඩා පරිශ්‍රයට ඇතුළු වී තිබිණි.