July 3, 2025
කුඩා පාර්සල් ආනයනය සඳහා නව බද්දක් හඳුන්වාදීම සම්බන්ධයෙන් එල්ල වන චෝදනා ප්‍රතික්ෂේප කරන බව ශ්‍රී ලංකා රේගුව පවසයි.
රේගුව පවසන්නේ මෑතකාලීනව සිදුකර ඇති ඇතැම් හඳුන්වාදීම් හුදෙක් නිෂ්පාදන වටිනාකම සහ වර්ගීකරණය මත පදනම්ව නිවැරදි රේගු බද්ද අයකිරීම සහතික කිරීමේ අරමුණින් සිදුකර ඇති බවයි.
රේගු මාධ්‍ය ප්‍රකාශක සහ අතිරේක අධ්‍යක්ෂ සීවලී අරුක්ගොඩ කියාසිටියේ, සමාජ මාධ්‍ය ඔස්සේ පැතිර යන වාර්තාවල දැක්වෙන පරිදි බදු අනුපාත ඉහළ දැමීමක් හෝ පාර්සල් නිෂ්කාශන නතර කිරීමක් සිදුවී නොමැති බවයි.
තීරුබදු වැඩිනොකරන බවත්, දැන් නිවැරදි මුදල අයකරන බවත්, මීට පෙර ප්‍රශ්නය වූයේ බොහෝ භාණ්ඩ අවතක්සේරු කර තිබීම සහ ඒවායේ සැබෑ වටිනාකම මත බදු ගණනය නොකිරීම බවත්, එම ගැටලු මේවනවිට නිරාකරණය කර ඇති බවත් ඔහු පැවසුවේය.
එමෙන්ම ඔහු පෙන්වාදුන්නේ රේගුව කිසිදු පාර්සලයක් රඳවා තබාගෙන නොමැති බව සහ පාර්ලිමේන්තුවෙන් නියම කර ඇති ප්‍රමාණයට වඩා තීරුබදු වැඩි කිරීමක් සිදුකර නොමැති බවයි.
තීරුබදු වැඩි බව ඇතැම් පුද්ගලයන් ප්‍රකාශ කළ ද නිසි ලෙස ක්‍රියාත්මක කරන අනුමත බද්ද එය බව ද රේගු මාධ්‍ය ප්‍රකාශකවරයා පැවසුවේය.
ශ්‍රී ලංකා රේගුව මේ වනවිට HS කේතය (Harmonized System) භාණ්ඩ වර්ගීකරණය මත පදනම් වූ පද්ධතියකට මාරු වී ඇති අතර, එමඟින් එක් එක් අයිතමයේ සැබෑ ස්වභාවය සහ වටිනාකම වඩාත් හොඳින් පිළිබිඹු වේ.
රේගු දෙපාර්තමේන්තුව විසින් මේ සම්බන්ධයෙන් කුරියර් සමාගම් සහ ආනයනකරුවන්ට කල්තියා දැනුම් දී ඇති අතර නව ක්‍රමයට හැඩගැසීමට සති දෙකක කාලයක් ද ලබා දී ඇත.
කුරියර් සේවා මගින් නිෂ්කාශනය සහ බෙදහැරීම සිදුකරන බැවින් මාර්ගගත ඇණවුම් ලබන්නන් රේගු කාර්යාල වෙත පැමිණීම අවශ්‍ය නොවන බව ද ඔහු වැඩිදුරටත් පැහැදිලි කළේය.
