ගාල්ල කොටුව ලන්දේසි රෝහල් ගොඩනැගිල්ල පිටුපස ඇති ගල්පර අද්දර සිට මුහුදට ගසාගෙන ගිය තරුණ යුවළක් බේරා ගැනීම සඳහා අවට සිටි පිරිසක් තම ජීවිත පරදුවට තබා කටයුතු කර තිබේ.

සිද්ධිය එම ස්ථානයේ සිටි එක් අයකු විසින් වීඩියෝ ගතකර ඇත.

වාර්තාවලට අනුව, ඊයේ සවස මෙම යුවළ ගාලු කොටුවේ ලන්දේසි රෝහල පිටුපස ඇති ගල්පර අද්දර සිටියදී හදිසියේම ශක්තිමත් රළ පහරක් හේතුවෙන් ඔවුන් දෙදෙනාම මුහුදට ඇද වැටී ඇත.

සිද්ධිය දුටු ලන්දේසි රෝහලේ ආරක්ෂක හා පරිපාලන භාර නිලධාරියා ඔවුන් බේරා ගැනීම සඳහා මුහුදට පැන ඇත.

පසුව ඔහු අවට සංචාරක ආයතනවල පිරිසට දැනුම් දුන් අතර, ඔවුන් යුවළ බේරා ගැනීමට දැඩි උත්සාහයක නිරත විය.

අහංගම සහ ලනුමෝදර පදිංචිකරුවන් වන බේරාගත් යුවළ පසුව ගාල්ල ජාතික රෝහලට ඇතුළත් කරන ලදී.