කොළඹ ඉඩම් රෙජිස්ට්‍රාර් කාර්යාලයේ ව්‍යාජ රබර් මුද්‍රා භාවිත කරමින් හොර ඔප්පු සකස් කර, වංචනික කණ්ඩායම් වෙත ලබාදීමේ මහා පරිමාණ ජාවාරමක් අපරාධ පරීක්ෂණ දෙපාර්තමේන්තුව විසින් අනාවරණය කරගෙන තිබේ.

මෙම සිදුවීමේ ප්‍රධාන සැකකාරිය ලෙස කොළඹ ඉඩම් රෙජිස්ට්‍රාර්වරිය අත්අඩංගුවට ගෙන ඇත.

මෙම අත්අඩංගුවට ගැනීමෙන් පසු, හිස්ව පවතින ඉඩම් සහ නිවාස සංවිධානාත්මක කල්ලි විසින් බලහත්කාරයෙන් අත්පත් කරගෙන, පසුව ඒවායින් ඉවත්වීම සඳහා සැබෑ අයිතිකරුවන්ගෙන් කප්පම් මුදල් ලබාගැනීමේ සිදුවීම් කිහිපයක් සම්බන්ධයෙන් ද පුළුල් විමර්ශන ආරම්භ කර තිබේ.

CID වෙත ලැබුණු පැමිණිල්ලකට අනුව මූල්‍ය හා වාණිජ අපරාධ විමර්ශන කොට්ඨාසය වෙත කැඳවීමෙන් අනතුරුව මෙම සැකකාරිය අත්අඩංගුවට ගෙන ඇත.

මූලික විමර්ශනවලදී හෙළි වී ඇත්තේ ඇය කොළඹ ඉඩම් රෙජිස්ට්‍රාර්වරිය ලෙස කටයුතු කරමින් සිටියදී, කාර්යාලයේ තිබෙන ලේඛන සහ ඔප්පු වෙළුම්වල පිටපත් පිටස්තර පුද්ගලයන් වෙත ලබාදී ඇති බවයි.

එමඟින් නීත්‍යානුකූල අයිතිකරුවන්ගේ ලේඛන ව්‍යාජ ලෙස සකස් කිරීමට සහ ඇතැම් අවස්ථාවලදී එම ඉඩම් විකිණීමට පවා ඇය සංවිධානාත්මක අපරාධ කල්ලි සමඟ කුමන්ත්‍රණය කර ඇති බව පරීක්ෂණවලදී අනාවරණය වී ඇත.

පොලිස් විමර්ශනවලට අනුව, මෙම කල්ලි විසින් බලහත්කාරයෙන් ඉඩම් හෝ දේපළ අත්පත් කරගැනීමෙන් පසු සැබෑ අයිතිකරුවන් ඊට විරෝධය දැක්වුවහොත්, ඔවුන් කප්පම් ඉල්ලීමේ උපක්‍රමයක් භාවිත කරයි. ඒ අනුව ඔවුන් එම පරිශ්‍රයෙන් ඉවත් වන්නේ විශාල මුදලක් ලබාගැනීමෙන් පසුව පමණි.

“මෙය ඉතා සංවිධානාත්මක පිරිසක් විසින් මෙහෙයවනු ලබන ජාවාරමක්. මේ සඳහා නීතිඥයින් සහ විශ්‍රාමික පොලිස් නිලධාරීන් කිහිපදෙනෙකු ද සම්බන්ධ වී සිටිනවා” යැයි ජ්‍යෙෂ්ඨ පොලිස් නිලධාරියෙක් ප්‍රකාශ කර ඇත.

පන්නිපිටිය ප්‍රදේශයේ පදිංචි කේ.කේ. රුවන්ති නාලිකා නැමැති මෙම සැකකාරිය කොළඹ ප්‍රධාන මහේස්ත්‍රාත් අසංක බෝදරගම හමුවට පත්කිරීමෙන් පසු රුපියල් මිලියනයක ඇප මත මුදා හැරීමට නියෝග කෙරිණි. එසේම ඇයට විදේශගත වීම තහනම් කරමින් නියෝගයක් ද පනවා ඇත.

අත්අඩංගුවට ගත් මෙම ඉඩම් රෙජිස්ට්‍රාර්වරියට එරෙහිව දණ්ඩ නීති සංග්‍රහයේ 113 (ආ) සහ 158 වගන්ති මෙන්ම පොදු දේපළ පනත යටතේ ද චෝදනා එල්ල වී තිබේ.