මෑතකදී සිදුකළ සිගරට් බදු ඉහළ දැමීමත් සමග සිගරට් සමාගම්වලට රුපියල් බිලියන 7ක පමණ අමතර ලාභයක් ලැබෙනු ඇති බව මධ්‍යසාර සහ මත්ද්‍රව්‍ය තොරතුරු මධ්‍යස්ථානය (ADIC) පවසයි.

වඩාත්ම ජනප්‍රිය සිගරට් කාණ්ඩයේ බද්ද සිගරට් එකකට රුපියල් 4.51කින් ඉහළ ගියද එම සිගරට් එකක සිල්ලර මිල රුපියල් 10කින් ඉහළ දමා ඇති නිසා එමඟින් සමාගම්වලට සැළකිව යුතු ලාභයක් ලබා ගත හැකි වී ඇති බව පෙනීයයි.

කාර්යක්ෂම බදු එකතු කිරීම සඳහා ශක්තිමත් පද්ධතියක් නොමැතිකම හේතුවෙන් ලාභ අනපේක්ෂිත ලෙස ඉහළ ගොස් ඇති බව ADIC ආයතනය පවසයි.

කුමන රජයක් බලයේ සිටියත්, දුම්කොළ සහ මධ්‍යසාර සමාගම් නිරන්තරයෙන් සැළකිව යුතු මූල්‍ය වාසි ලබා ගැනීමට සමත් වී ඇති බව ඔවුන් සඳහන් කර ඇත.

ශ්‍රී ලංකාවේ වාර්ෂිකව සිදුවන අකල් මරණ 15,000කට පමණ මත්පැන් පරිභෝජනය වගකිව යුතු බවත්, දුම්පානය හේතුවෙන් සෑම වසරකම මරණ 20,000කට ආසන්න සංඛ්‍යාවක් සිදුවන බවත් AIDIC ආයතනය පෙන්වා දෙයි.

2023 දී, මධ්‍යසාර බදු 20%කින් වැඩිවීම නිසා මධ්‍යසාර පරිභෝජනය ලීටර් මිලියන 8.3කින් අඩු වූ අතර මධ්‍යසාරවලින් රජයට ලැබෙන සුරාබදු ආදායම රුපියල් බිලියන 11.6කින් වැඩි විය.

සිගරට් අලෙවිය ද ඒ අයුරින්ම පහත වැටුණද, එයින් ලැබුණු බදු ආදායම රුපියල් බිලියන 7.7කින් ඉහළ ගියේය.

ADIC හි විධායක අධ්‍යක්ෂ සම්පත් ද සේරම් පවසා ඇත්තේ පරිභෝජන රටාවන්ට සහ රජයේ ආදායමට බදු අය කිරීමේ බලපෑම එම සංඛ්‍යා මගින් පෙනී යන බවයි.