විදේශ රැකියා වංචා සම්බන්ධයෙන් විදේශ රැකියා කාර්යාංශයේ විශේෂ විමර්ශන ඒකකය විසින් සැකකරුවකු සහ සැකකාරියක අත්අඩංගුවට ගෙන ඇත.

අදාළ සැකකරුවන් විසින් විදේශ රැකියා ලබාදෙන බවට පොරොන්දු වී මුදල් ලබාගෙන ඇතැයි පැවසෙන විවිධ පුද්ගලයින්ගෙන් ලද පැමිණිලි මත, රුපියල් මිලියන 69 කට වඩා වැඩි විදේශ රැකියා වංචාවක් සම්බන්ධයෙන් අත්අඩංගුවට ගැනීම සිදුකර තිබේ.

ඔවුන්ට එල්ල වන එක් චෝදනාවකට අනුව කැනඩාවේ ගොවිපොළවල රැකියා ලබාදෙන බවට පොරොන්දු වෙමින් ගාල්ල සහ නිකවැරටිය ප්‍රදේශවල පදිංචිකරුවන් සිව්දෙනකුගෙන් මුදල් වංචා කර ඇත.

චෝදනා එල්ල වන සැකකරුවන්ගෙන් එක් අයකු විශ්‍රාමික වතු කළමනාකරුවකු වන අතර ඔහු වරකාපොළදී අත්අඩංගුවට ගෙන තිබේ.

එම සැකකරු එක් පැමිණිලිකරුවකුගෙන් රුපියල් මිලියන 13 බැගින් රුපියල් මිලියන 52 ක් එකතු කර ඇති නමුත්, පොරොන්දු වූ පරිදි රැකියා ලබාදීමට අපොහොසත් වී ඇතැයි පැවසේ.

ලැබුණු පැමිණිලි මත පදනම්ව විදේශ රැකියා කාර්යාංශයේ නිලධාරීන් වරකාපොළ, අම්බලගකන්ද ප්‍රදේශයේ පිහිටි නිවසේදී සැකකරු අත්අඩංගුවට ගෙන ඇති අතර, වැටළීමේදී, සයිප්‍රස් රැකියා දීමනා සම්බන්ධ ගිවිසුම් තුනක් ද බලධාරීන් විසින් සොයාගෙන තිබේ.

සැකකරු වරකාපොළ මහේස්ත්‍රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කර තිබේ.

මේ සම්බන්ධයෙන් අත්අඩංගුවට ගැනුණු සැකකාරිය ස්විට්සර්ලන්තයේ රැකියා ලබාදෙන බවට පොරොන්දු වෙමින් පුද්ගලයකුගෙන් රුපියල් මිලියන 1.7 ක මුදලක් වංචා කර ඇතැයි වාර්තා වේ.

කොළඹ ප්‍රමුඛ පෙළේ පෞද්ගලික රෝහලක මහජන සම්බන්ධතා නිලධාරිනියක් වන සැකකාරිය, ඇයගේ සේවා ස්ථානයේදී අත්අඩංගුවට ගෙන කළුතර මහේස්ත්‍රාත් අධිකරණයට ඉදිරිපත් කළ අතර එහිදී ඇය නොවැම්බර් 25 වන දින දක්වා රක්ෂිත බන්ධනාගාරගත කර තිබේ.

වංචනික විදේශ රැකියා නියෝජිතයන් සම්බන්ධයෙන් දිනපතා පැමිණිලි විශාල සංඛ්‍යාවක් ලැබෙන බවත්, ඊට සම්බන්ධ අය අත්අඩංගුවට ගැනීම සඳහා මෙහෙයුම් පුළුල් කර ඇති බවත් ශ්‍රී ලංකා විදේශ රැකියා කාර්යාංශය ප්‍රකාශ කරයි.

නීතිවිරෝධී විදේශ රැකියා ඒජන්සි හෝ පුද්ගලයන් පිළිබඳ තොරතුරු 011 288 2228 ක්ෂණික දුරකථන අංකයට දැනුම් දෙන ලෙස එම කාර්යංශය මහජනතාවගෙන් ඉල්ලා සිටී.