ඇමෙරිකා එක්සත් ජනපදය සහ කැනඩාව අතර අවසන් මොහොත දක්වා පැවැති වෙළඳ සාකච්ඡා හදිසියේම බිඳ වැටීමත් සමඟ උතුරු ඇමෙරිකානු කලාපයේ වෙළඳ යුද්ධය නැවතත් උණුසුම් වී ඇත.

මේ අනුව කැනඩා භාණ්ඩ මත පැනවූ 50%ක ඇමෙරිකානු තීරුබදුවලට සමාන ලෙස ප්‍රතිචාර දක්වන බවට කැනඩා අගමැති මාක් කාර්නි ප්‍රකාශ කර තිබේ.

කැනඩා භාණ්ඩ මත පැනවීමට නියමිතව තිබූ 50%ක තීරුබදු වැළැක්වීම සඳහා දෙපාර්ශ්වයම දැඩි උත්සාහයක නිරත වූවත්, කැනඩාවේ අරමුණු ඉටුකර ගත නොහැකි වීම හේතුවෙන් සාකච්ඡා අත්හිටුවීමට සිදුවූ බව අගමැති මාක් කාර්නි පැවසීය.

ඇමෙරිකාව ඉදිරිපත් කළ අවසන් කොන්දේසි අසාධාරණ සහ විශ්වාස කළ නොහැකි බව පවසමින් කැනඩා නියෝජිතයන් නැවත ඔටාවා වෙත කැඳවීමට අගමැතිවරයා පියවර ගෙන ඇත.

මෙසේ සාකච්ඡා බිඳ වැටීමත් සමඟ ඇමෙරිකානු ඩොලර් බිලියන 20ක් පමණ වටිනා කැනඩා භාණ්ඩ සඳහා 50%ක තීරුබදු ක්‍රියාත්මක වේ.

ඇමෙරිකාව පනවන සෑම තීරුබදු ඩොලරයකටම ‘ඩොලරයට ඩොලරයක්’ ලෙස ප්‍රති-තීරුබදු පනවන බවත්, කැනේඩියානු ව්‍යාපාර සහ කම්කරුවන් ආරක්ෂා කිරීමට කටයුතු කරන බවත් අගමැති කාර්නි අවධාරණය කළේය.

ඇමෙරිකානු වෙළඳ නියෝජිත ජේමිසන් ග්‍රියර් ප්‍රකාශ කළේ ඇමෙරිකාව විසින් වානේ, ඇලුමිනියම් සහ වාහන සඳහා වූ බදු අඩු කිරීමට යෝජනා කළ ද, කැනඩාව අලුතින් ඉදිරිපත් කළ ඉල්ලීම් හේතුවෙන් එකඟතාව බිඳ වැටුණු බවයි.

එසේම, ඇමෙරිකානු කිරි නිෂ්පාදන සඳහා කැනඩාව පනවා ඇති කෝටා සීමාවන් සහ ඇමෙරිකානු මත්පැන් කැනඩාවේ ප්‍රාන්ත මට්ටමින් තහනම් කිරීමට පියවර ගැනීම ද මෙම මතභේදයට ප්‍රධාන හේතුවක් වී තිබේ.