ඇල්ල-වැල්ලවාය ප්‍රධාන මාර්ගයේ සිදු වූ අනතුරට සම්බන්ධ බස් රථය 2023 දී ජාතික ප්‍රවාහන කොමිෂන්(NTC) සභාවෙන් ලියාපදිංචිය ඉවත් කර ඇති බව ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන පැවසීය.

විනෝද චාරිකා සඳහා පමණක් යොදා ගන්නා බස් රථ නිරීක්ෂණය කිරීම සඳහා තවමත් රෙගුලාසි හඳුන්වා දී නොමැති බව ඔහු සඳහන් කළේය.

කෙසේවෙතත්, මාර්ග සංවර්ධන අධිකාරිය මාර්ගයේ අනතුරු අවම කිරීම සඳහා හැකි සෑම පියවරක්ම ගෙන ඇති බව ඔහු වැඩිදුරටත් පැවසීය.

මේ අතර, මෝටර් රථ ප්‍රවාහන දෙපාර්තමේන්තුවේ කණ්ඩායමක් බස් රථය පරීක්ෂා කිරීම සඳහා අනතුර සිදු වූ ස්ථානයට පැමිණ තිබේ.

ඊට අමතරව, ජාතික ප්‍රවාහන වෛද්‍ය ආයතනයේ (NTMI) සහ ප්‍රවාහන අමාත්‍යාංශයේ මාර්ග ආරක්ෂණ වැඩසටහනේ නිලධාරීන් අද (6) ඇල්ල ප්‍රදේශයේ දී වැඩිදුර පරීක්ෂණ පැවැත්වීමට නියමිතය.

ඇල්ල-වැල්ලවාය ප්‍රධාන මාර්ගයේ කිලෝමීටර් 24 කණුව අසල දී සිදු වූ මෙම අනතුරේ දී විනෝද චාරිකාවක් සඳහා පිරිසක් රැගත් බස් රථයක් මාර්ගයෙන් ඉවතට පැන ප්‍රපාතයකට පෙරළී ගියේය.

අනතුරින් බස් රථයේ සිටි පහළොස් දෙනෙකු මිය ගියහ.