පුද්ගලයින් 40 දෙනෙකු පමණ රැගත් බස් රථයක් මධ්‍යම බංග්ලාදේශයේ ගඟකට පෙරළී යෑමෙන් පුද්ගලයන් 24 දෙනෙකු මිය ගොස් තිබේ.

ඩකා අගනුවර සිට කිලෝමීටර් 84ක් පමණ දුරින් පිහිටි රාජ්බාරි දිස්ත්‍රික්කයේ දී ඊයේ දහවල් බස් රථය පද්මා ගඟට පෙරළී ගොස් ඇති බව ප්‍රාදේශීය ගිනි නිවන සේවා සහ සිවිල් ආරක්ෂක නිලධාරි දේවාන් සොහෙල් රානා පැවසීය.

ඉස්ලාමීය ඊද්-උල්-ෆිතර් උත්සවයෙන් පසු ජනතාව නැවත රැකියාවට යෑම සඳහා කුෂ්ටියා හි නිරිතදිග දිස්ත්‍රික්කයේ සිට අගනුවරට යමින් සිටියදී මෙම අනතුර සිදුව ඇත.

අනතුරෙන් පසු මගීන්ගෙන් සුළු පිරිසක් ආරක්ෂිත ස්ථානයකට පිහිනා යෑමට සමත්ව ඇති නමුත් කිහිප දෙනෙකු බස් රථයේ සිරවී සිටි බව රානා පැවසීය.

ගිනි නිවන සේවා ඒකක හතරක් සහ කිමිදුම්කරුවන් 10 දෙනෙකු සෝදිසි කිරීමේ සහ ගලවා ගැනීමේ මෙහෙයුමට නායකත්වය දී තිබූ අතර, හමුදාව, පොලිසිය, වෙරළාරක්ෂක සහ පළාත් පාලන ආයතනවල සහාය ද ඊට ලැබී තිබිණි.

පසුව ගලවා ගැනීමේ නෞකාවක් ද මෙහෙයුමට එක් වූ අතර එමගින් බස් රථය එසවීමට හැකි වූ බව රානා පැවසීය.

ගලවා ගැනීමේ නිලධාරීන් මළ සිරුරු සොයා ගැනීමට එක රැයකින් කටයුතු කළ අතර අද උදෑසන වන විට 24 දෙනෙකු සොයා ගැනීමට හැකි වී තිබිණි.

කෙසේවෙතත්, අධික වර්ෂාපතනය හේතුවෙන් ගලවා ගැනීමේ කටයුතුවලට බාධා එල්ල වූ බව රානා පැවසීය.

මියගිය අය අතර කාන්තාවන් 11 දෙනෙකු සහ ළමුන් පස් දෙනෙකු ඇතුළත් බව තවත් ගිනි නිවන සේවා සහ සිවිල් ආරක්ෂක නිලධාරියකු වන තල්හා බින් සාසිම් පැවසීය.

කිසිවකු අතුරුදහන් වී ඇත්ද යන්න පැහැදිලි නැත.

බංග්ලාදේශයේ මාර්ග සහ තොටුපළ අනතුරුවලින් සෑම වසරකම සිය ගණනක් මිය යති.