මෙම වසරේ දෙසැම්බර් මාසය වන විට කොළඹ නෙළුම් කුළුණේ සිට ‘බන්චි පිම්ම’ (Bungee Jumping) පැනීමේ වැඩසටහනක් ආරම්භ කිරීමට සැලසුම් කර ඇති බව එහි කළමනාකාර ප්‍රධානී ප්‍රසාද් සමරසිංහ සඳහන් කරයි.

බන්චි පිම්ම යනු දිගු ඉලාස්ටික් ලණුවකට සම්බන්ධ වී සිටින පුද්ගලයකු විශාල උසකින් පැනීමේ ක්‍රියාකාරකමකි.

මීට පෙර ශ්‍රී ලංකාවේ ප්‍රථම වරට මෙම බන්චි පිම්ම පැනීම ආරම්භ කිරීමට නෙළුම් කුළුණ සහ සිංගප්පූරු Go Bungy සමාගම කොන්ත්‍රාත්තුවක් අත්සන් කර ඇති අතර, එය ක්‍රියාත්මක කිරීමෙන් පසු, ලොව උසම බන්චි පිම්ම පැනීම මෙය බවට පත්වනු ඇතැයි ප්‍රකාශ කෙරිණි.

බන්චි පිම්ම පැනීම අගෝස්තු මාසයේදී ආරම්භ කිරීමට සැලසුම් කර තිබුණද, ඒ සඳහා යම් යම් වැඩිදියුණු කිරීම් සිදුකළ යුතු බවට කළමනාකාරීත්වය සොයාගත් බැවින් එය සිදු කිරීමට ප්‍රමාද වූ බවත්, එම නිසා නැවතත් සමාගම සිය සැලසුම් වෙනස් කර ඇති බවත්, කළමනාකාර ප්‍රධානීවරයා පවසයි.

මෑත කාලයේදී මෙරට සංචාරක කර්මාන්තය අන්තර්ජාතිකව ප්‍රවර්ධනය කිරීම සඳහා පළමු පැරෂුට් පිම්ම (ප්‍රදර්ශන පිම්මක්) සංදර්ශනයක් නෙළුම් කුළුණේ පසුගියදා සංවිධානය කර තිබිණි.

එහිදී පැරෂුට්කරුවන් දෙදෙනෙක් කුළුණෙන් බිමට පනිනු ලැබුවේ, පැනීම පටිගත කිරීම සඳහා ඔවුන්ගේ ශරීරයට කැමරා සවිකරගෙනය.