July 22, 2025
දඹුල්ල ඉනාමළුව වන රක්ෂිතයේ දිගම්පතහ ප්‍රදේශයෙන් මසකට පමණ පෙර මියගොස් ඇති බවට විශ්වාස කෙරෙන ඇතකු ඇතුළු වන අලි තිදෙනකුගේ මළසිරුරු සොයාගත් බව වාර්තා වේ.
ප්‍රදේශවාසීන් කිහිපදෙනෙකු ජනමාධ්‍යවේදීන් කණ්ඩායමක් සමඟ මෙම මළසිරුරු වෙත ගොස් ඇත.
මෙම සිරුරු සොයාගත් ප්‍රදේශය නිතර වන සතුන් මෙන්ම දඩයම්කරුවන්ද ගැවසෙන ප්‍රදේශයක් බව පැවැසේ.
මෙම අලි මරණ පිළිබඳව ප්‍රදේශවාසීන් කිහිපවතාවක්ම අදාළ නිලධාරීන්ට දැනුම් දී ඇති බව වාර්තා වේ.
කෙසේවෙතත් පසුව අලි මළසිරුරු නිරීක්ෂණය කිරීමෙන් පසු, වන සංරක්ෂණ නිලධාරීන් සීගිරිය වනජීවී කාර්යාලයට දැනුම් දී ඇති බව ආරංචි මාර්ග පවසයි.
විමර්ශනය අතරතුර, කණ්ඩායමට කිලෝමීටරයක පමණ පරතරයකින් මළසිරුරු තුනක් සොයා ගැනීමට හැකිව තිබේ.
එහිදී සොයාගත් ඇතාගේ සිරුරින් දළ යුවල කපාගෙන ගොස් ඇති බව නිරීක්ෂණය වී තිබේ.
මෙය දඩයම්කරුවන්ගේ ක්‍රියාවක් බවට විශ්වාස කෙරේ.
කෙසේවෙතත්, මෙම මරණවලට හේතුව පිළිබඳව තවමත් කිසිදු පරීක්ෂණයක් පවත්වා නොමැති බවත්, අලි ඇතුන් මරා දමා ඇත්දැයි තීරණය කිරීම සඳහා පශ්චාත් මරණ පරීක්ෂණ සිදුකර නොමැති බවත් නිලධාරීන් පවසා ඇත.
