May 11, 2026
දේපළ වංචනික හා අපරාධ ක්රියාකාරකම් සඳහා අනිසි ලෙස භාවිත කළ හැකි බැවින් නිවාස, මහල් නිවාස, වාණිජ ගොඩනැගිලි සහ වෙනත් පරිශ්ර කුලියට ගැනීමේදී හෝ බදු දීමේදී සුපරීක්ෂාකාරී වන ලෙස ශ්රී ලංකා පොලිසිය දේපළ හිමියන්ගෙන් ඉල්ලා සිටී.
නිවේදනයක් නිකුත් කරමින් පොලිසිය පැවසුවේ ඇතැම් පුද්ගලයන් සහ සංවිධානාත්මක කණ්ඩායම් කෙටි කාලීන හෝ දිගු කාලීන කුලී පදනම මත නේවාසික සහ වාණිජ දේපළ ලබාගෙන විවිධ නීති විරෝධී ක්රියාකාරකම් සිදු කිරීමට ඒවා භාවිත කරන බව නිරීක්ෂණය වී ඇති බවයි.
බොහෝ අවස්ථාවන්හිදී, හිමිකරුවන් තම පරිශ්රයන්හි සිදුවන නීති විරෝධී මෙහෙයුම් පිළිබඳ නොදන්නා බව පෙන්වා දුන් පොලිසිය, එහි ප්රතිඵලයක් ලෙස ඔවුන්ට සැළකිව යුතු නීතිමය සංකූලතා සහ ඇතැම් අවස්ථාවල අපරාධ වගකීම්වලට මුහුණ දීමට සිදුවිය හැකි බව පැවසීය.
පසුගිය වසර සහ 2026 වසරේ මේ දක්වා කාලය තුළ, නවීන මාර්ගගත මූල්ය වංචා මෙහෙයුම්වලට සම්බන්ධ විදේශීය ජාතිකයන් අත්අඩංගුවට ගැනීමේ සැළකිව යුතු වැඩිවීමක් සිදුවී ඇති බව පොලිසිය තවදුරටත් පවසයි.
දිවයිනේ විවිධ ප්රදේශවල නිවාස සංකීර්ණ, හෝටල් සහ ලැගුම්හල්වල මෙම ක්රියාකාරකම් රහසිගතව සිදු කර ඇත.
අවස්ථා කිහිපයකදී, සැකකරුවන් ආගමන හා විගමන දෙපාර්තමේන්තුවේ රෙගුලාසි උල්ලංඝනය කරන බවට සොයා ගන්නා ලද අතර, මෙම වැරදි සිදු කිරීමේදී භාවිත කරන ලද පරිගණක සහ අනෙකුත් ඉලෙක්ට්රොනික උපකරණ අත්අඩංගුවට ගන්නා ලදී.
ආගමන හා විගමන දෙපාර්තමේන්තුව සහ ශ්රී ලංකා පොලිසිය වගකිව යුතු අයට එරෙහිව නීතිමය පියවර ගෙන තිබේ.
එබැවින්, එවැනි තත්ත්වයන්ගෙන් ආරක්ෂා වීම සඳහා, මහජනතාවට පහත සඳහන් කරුණු සැළකිල්ලට ගන්නා ලෙස පොලිසිය අනතුරු අඟවයි.
පොලිස් ආඥා පනතේ 76 වැනි වගන්තිය යටතේ, නිවසක පදිංචි සියලුම පුද්ගලයන් පිළිබඳ තොරතුරු ලබා ගැනීමට පොලිසියට බලය ඇත.
පවුලේ සාමාජිකයන්, ගෘහ කාර්ය මණ්ඩලය සහ තාවකාලික පදිංචිකරුවන්ගේ විස්තර අදාළ පොලිස් ස්ථානයට ලබා දීමට ගෘහ මූලිකයා කටයුතු කළ යුතුය.
පදිංචිකරුවන්ගේ පැමිණීම හෝ පිටවීම ඇතුළුව පදිංචියේ සිදුවන ඕනෑම වෙනසක් ළඟම ඇති පොලිස් ස්ථානයට වහාම වාර්තා කළ යුතුය.
මෙම නීතිමය අවශ්යතාවලට අනුකූල වීමට අපොහොසත් වීම දඬුවම් ලැබිය හැකි වරදකි.
සැක සහිත පරිශ්රයන් හෝ පුද්ගලයන් පිළිබඳ තොරතුරු සෑම පොලිස් කොට්ඨාසයකම පිහිටුවා ඇති මහජන ආරක්ෂක කමිටුවල සාමාජිකයන් හරහා ද වාර්තා කළ හැකි බව පොලිසිය තවදුරටත් පැවසීය.
කුලී හෝ කල්බදු ගිවිසුම්වලට එළඹීමට පෙර කුලී නිවැසියන්ගේ අනන්යතාව, පසුබිම සහ අරමුණ සත්යාපනය කරන ලෙස දේපළ හිමියන්ට දැඩි ලෙස උපදෙස් දෙනු ලැබේ.
මෙම පූර්වාරක්ෂාවන් අනුගමනය කිරීමෙන් වංචා සහ අනෙකුත් අපරාධ ක්රියාකාරකම්වල අවදානම අඩු කර ගත හැකි අතර අනවශ්ය නීතිමය සහ පෞද්ගලික දුෂ්කරතා මඟහරවා ගත හැකි බව පොලිසිය පෙන්වාදෙයි.
එවැනි වැරදිවලට සම්බන්ධ අය හඳුනාගෙන අත්අඩංගුවට ගැනීම සඳහා අඛණ්ඩව මෙහෙයුම් සිදු කරන බව ශ්රී ලංකා පොලිසිය තවදුරටත් ප්රකාශ කළේය.
දේශීය හෝ විදේශීය වංචාකරුවන්, ජාවාරම්කරුවන්, අපරාධකරුවන් හෝ ඕනෑම නීති විරෝධී සහ සමාජ විරෝධී ක්රියාකාරකම් පිළිබඳ ඕනෑම තොරතුරක් පොලිස් හදිසි ඇමතුම් අංක 119 හෝ 118 හෝ ළඟම ඇති පොලිස් ස්ථානයට ප්රමාදයකින් තොරව වාර්තා කරන ලෙස මහජනතාවගෙන් ඉල්ලා සිටියි.
