නීතිවිරෝධී ලෙස උපයාගත් රුපියල් මිලියන 50ක අරමුදල් භාවිත කරමින් ඉඩම් නීතිවිරෝධී ලෙස අත්පත් කරගැනීම සම්බන්ධයෙන් වන නඩුවකට අදාළව ශ්‍රී ලංකා පොදුජන පෙරමුණේ නිර්මාතෘ බැසිල් රාජපක්ෂ නොවැම්බර් 21 වැනි සිකුරාදා මාතර මහේස්ත්‍රාත් අධිකරණය හමුවේ පෙනීසිටීමට නියමිතය.

කෙසේවෙතත්, බැසිල් රාජපක්ෂ නඩු විභාගය සඳහා ශ්‍රී ලංකාවට නැවත පැමිණේද යන්න තවමත් අවිනිශ්චිතය.

පුටුවකින් වැටීමෙන් පසු කොඳු ඇට පෙළේ සහ ස්නායු සංකූලතා සඳහා ඔහු එක්සත් ජනපදයේ ප්‍රතිකාර ලබමින් සිටින බව බැසිල් රාජපක්ෂගේ නීති කණ්ඩායම පසුගිය මැයි මාසයේදී අධිකරණයට පැවසීය.

ලබන සිකුරාදා නඩු කටයුතු සඳහා පැමිණීමට ඔහුට ඇති හැකියාව පිළිබඳව ප්‍රශ්න මතුකරමින් ඇමරිකානු වෛද්‍යවරයකු ඔහුට මාස හයක් ගුවන් ගමන්වලින් වැළකී සිටින ලෙස උපදෙස් දුන් බව ඔවුහු පැවසූහ.

පෙර නඩු විභාගවලට ඔහු නොපැමිණීම මත ඔහුගේ ඇප අවලංගු කර වරෙන්තුවක් නිකුත් කරන ලෙස එහිදී පැමිණිලි පාර්ශ්වය ඉල්ලා සිටියේය.

කෙසේවෙතත් පෙර තත්වයන් සැලකිල්ලට ගනිමින් අධිකරණය එය ප්‍රතික්ෂේප කළ නමුත් ඊළඟ දිනයේ පෙනීසිටින ලෙස ඔහුට නියෝග කළේය.

මේ අතර බැසිල් රාජපක්ෂ විසින් ආරම්භ කරන ලද ශ්‍රී ලංකා පොදුජන පෙරමුණ විසින් නොවැම්බර් 21 වැනි දින නුගේගොඩදී ආණ්ඩු විරෝධී රැළියක් පැවැත්වීමට කටයුතු සංවිධානය කර ඇත.

කෙසේවෙතත්, බැසිල් රාජපක්ෂ ශ්‍රී ලංකාවට පැමිණීමට අදහස් කරන්නේද යන්න පිළිබඳව ඔහුගේ නියෝජිතයින්ගෙන් හෝ පවුලේ අයගෙන් නිල තහවුරු කිරීමක් ලැබී නොමැත.