July 21, 2026
ශ්රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්රාම ගැන්වීමේ වයස ඉහළ දැමීම සඳහා යෝජනා වී ඇති ආණ්ඩුක්රම ව්යවස්ථා සංශෝධනය සම්බන්ධයෙන් ශ්රී ලංකා නීතිඥ සංගමය සිය දැඩි විරෝධය පළකර තිබේ.
මේ සම්බන්ධයෙන් එම සංගමයේ සභාපති රජීව් අමරසූරියගේ සහ ලේකම් නලින් ද සිල්වාගේ අත්සනින් යුතුව අධිකරණ සහ ජාතික ඒකාබද්ධතා අමාත්ය ගරු හර්ෂණ නානායක්කාර වෙත විශේෂ ලිපියක් යොමුකර ඇත.
නීතිඥ සංගමය පෙන්වා දෙන්නේ, වත්මන් විනිසුරුවරුන්ගේ විශ්රාම වයස 1978 ව්යවස්ථාව ප්රකාශයට පත්කළ දින සිට කිසිදු වෙනසකින් තොරව පවතින බවයි.
එම විධිවිධාන වෙනස් කිරීමට තරම් කිසිදු සාධාරණීකරණයක් හෝ ප්රබල ආයතනික අවශ්යතාවක් මෙතෙක් ඉදිරිපත් වී නොමැති බව ඔවුහු පවසති.
ඉහළ අධිකරණවල වත්මන් විනිසුරුවරුන්ගේ ධුර කාලය දීර්ඝ කිරීම පමණක් අරමුණු කරගනිමින් මෙවැනි ව්යවස්ථා සංශෝධන සිදුනොකළ යුතු බවත්, එය අධිකරණයේ ස්වාධීනත්වයට සහ නීතියේ ආධිපත්යයට බරපතළ බලපෑමක් එල්ල කරන බවත් එම ලිපියෙහි අවධාරණය කර ඇත.
පසුගිය ජූලි 14 වැනිදා පැවති කැබිනට් රැස්වීමෙන් අනතුරුව, මෙම යෝජනාව සම්බන්ධයෙන් කැබිනට් මණ්ඩලය පත් කරන පෙර කමිටුවේ වාර්තාව ඉදිරිපත් කරන ලෙස අධිකරණ අමාත්යාංශයෙන් ඉල්ලා ඇති බව නීතිඥ සංගමය සඳහන් කරයි.
මෙම තත්ත්වය සැලකිල්ලට ගනිමින්, කිසිදු ඉදිරි පියවරක් ගැනීමට පෙර මේ පිළිබඳව පරිපූර්ණ අධ්යයනයක් සිදුකර විෂයබද්ධ වාර්තාවක් ඉදිරිපත් කිරීම සඳහා අමාත්යාංශය, අධිකරණය, නීතිඥ සංගමය සහ වෙනත් ප්රමුඛ පාර්ශ්වයන්ගෙන් සමන්විත සුදුසු කමිටුවක් පත්කරන ලෙස ඔවුහු ඉල්ලා සිටිති.
තවද, මෙම සංශෝධනය සම්බන්ධයෙන් පුළුල් මහජන සාකච්ඡාවක් සහ ව්යුහගත උපදෙස් විමසීමක් සිදු කිරීමේ අවශ්යතාව ද නීතිඥ සංගමය විසින් පෙන්වා දී තිබේ.
මේ පිළිබඳව සාකච්ඡා කිරීම සඳහා කඩිනමින් අවස්ථාවක් ලබා දෙන ලෙස ද සංගමය අධිකරණ අමාත්යවරයාගෙන් වැඩිදුරටත් ඉල්ලා ඇත.
