කපිල විජේගුණවර්ධනගේ ප්‍රධානත්වයෙන් යුත් නව තේරීම් කමිටුව විසින් නායකත්ව වගකීම් ලබා දී මාස කිහිපයකට පසුව, ශ්‍රී ලංකා එක්දින සහ T20I කණ්ඩායම්වල උපනායකත්වයෙන් කමිඳු මෙන්ඩිස් ඉවත් කර තිබේ.

ඉදිරි එංගලන්ත සංචාරය සඳහා ශ්‍රී ලංකා ක්‍රිකට් ආයතනය විසින් නම් කරන ලද සංචිතවල එක්දින සහ T20I කණ්ඩායම් දෙකෙහිම උපනායක ලෙස හිටපු සීමිත පන්දුවාර නායක චරිත් අසලංක නම් කර ඇති අතර, කුසල් මෙන්ඩිස් නායකයා ලෙස තවදුරටත් කටයුතු කරයි.

පසුගිය මැයි මාසයේ පැවැති බටහිර ඉන්දීය කොදෙව් සංචාරයට පෙර කමිඳු මෙන්ඩිස් ශ්‍රී ලංකා සියලුම ආකෘතීන්හි උපනායකයා ලෙස පත්කිරීමෙන් පසුව මෙම වෙනස සිදුවිය.

එහිදී ඔහු එක්දින සහ T20I තරඟවලදී කුසල් මෙන්ඩිස්ගේ ද, ටෙස්ට් තරඟවලදී ධනංජය ද සිල්වාගේ ද උපනායකයා ලෙස නම්කෙරිණි.

කෙසේවෙතත්, එංගලන්ත සීමිත පන්දුවාර සංචාරය සඳහා තේරීම් කමිටුව විසින් නැවතත් උපනායකත්වය අසලංක වෙත පවරා ඇත.

කමිඳු එක්දින සහ T20I සංචිත දෙකටම ඇතුළත්ව සිටියි.

නව තේරීම් කමිටුව පත් කිරීමෙන් පසු කුසල් මෙන්ඩිස් වෙත නායකත්වය පැවරීමට පෙර, චරිත් අසලංක සීමිත පන්දුවාර ක්‍රිකට් කණ්ඩායමේ නායකයා ලෙස කටයුතු කළේය.

එක්දින සහ T20I උපනායකත්වයෙන් කමිඳු මෙන්ඩිස් ඉවත් කිරීමට හේතුව මෙතෙක් නිල වශයෙන් හෙළිකර නොමැත.

ආකෘති දෙක සඳහාම ක්‍රීඩකයින් 16 දෙනකුගෙන් යුත් සංචිත ශ්‍රී ලංකාව විසින් නම්කර ඇති අතර, ඔවුන් එංගලන්තයේදී T20I තරඟ 3 කට සහ එක්දින තරඟ 3 කට ක්‍රීඩා කිරීමට නියමිතය.

කණ්ඩායම සෙප්තැම්බර් 5 වැනිදා එංගලන්තය බලා පිටත්ව යාමට නියමිතය.