බ්ලූම්ෆීල්ඩ් ක්‍රීඩා සමාජයේ සේවකයකුට පහරදීමේ සිද්ධියක් සම්බන්ධයෙන් අත්අඩංගුවට ගත් 17 හැවිරිදි පාසල් ක්‍රිකට් ක්‍රීඩකයෙකු අගෝස්තු 24 වනදා දක්වා පරිවාස භාරයේ තැබීමට කොළඹ අධිකරණය නියෝග කර තිබේ.

මෙම නඩුව අද(17) කොළඹ මහේස්ත්‍රාත් අධිකරණය හමුවේ කැඳවූ අවස්ථාවේදී මෙම නියෝගය නිකුත් කෙරිණි.

අගෝස්තු 8 වනදා කොළඹ බ්ලූම්ෆීල්ඩ් ක්‍රීඩාංගණයේදී සිදුවූ සිදුවීමකින් පසුව කුරුඳුවත්ත පොලිසිය විසින් මෙම ක්‍රීඩකයා අත්අඩංගුවට ගන්නා ලදී.

මොරටුව ප්‍රදේශයේ පදිංචි සුමිත් ප්‍රනාන්දු නැමැති 62 හැවිරිදි පහර කෑ සේවකයා පසුව කොළඹ ජාතික රෝහලට ඇතුළත් කර ඇති අතර ප්‍රතිකාර ලබමින් සිටියදී මියගොස් තිබේ.

පුහුණුවීම්වල නිරත වෙමින් සිටි ක්‍රිකට් ක්‍රීඩකයින් පිරිසක් පානීය ජලය ලබාගැනීම සඳහා ජල කරාමයක් අසලට ගිය අවස්ථාවේ එහි වතුර නොමැති වීම නිසා මෙම සිද්ධිය ආරම්භ වී ඇති බව පොලීසිය අධිකරණයට පැවසීය.

එහිදී ක්‍රීඩකයන් සහ අදාළ සේවකයා අතර බහින්බස්වීමක් ඇතිවී තිබේ. පොලිස් විමර්ශනවලින් හෙළි වී ඇත්තේ අදාළ සේවකයා ක්‍රීඩකයකුට පහරදීමට උත්සාහ කර ඇති අතර, පසුව මෙම 17 හැවිරිදි ක්‍රීඩකයාට ද පහර දීමට උත්සාහ කළ අවස්ථාවේ ඔහු විසින් සේවකයාට පහර දී ඇති බවයි.

මියගිය සුමිත් ප්‍රනාන්දු හෘද රෝග ඉතිහාසයකින් පෙළුණු අයෙකු වන අතර, ඔහුගේ මරණය මෙම පහරදීමට සම්බන්ධද නැතහොත් පවතින වෛද්‍ය තත්ත්වයක් නිසා සිදුවූවක්ද යන්න පිළිබඳව බලධාරීන් පරීක්ෂණ පවත්වයි. පශ්චාත් මරණ පරීක්ෂණයේදී විවෘත තීන්දුවක් ලබාදී ඇති අතර, පටක සාම්පල වැඩිදුර පරීක්ෂණ සඳහා යොමු කිරීමට නියමිත බව මීට පෙර වාර්තා විය.

මේ අතර, මාකොළ රඳවා තැබීමේ මධ්‍යස්ථානයේ සිටියදී මෙම ක්‍රීඩකයා වෙනත් බාලවයස්කාරයකුගේ පහරදීමට ලක්ව දැනට රාගම රෝහලේ ප්‍රතිකාර ලබන බව ඔහුගේ නීතිඥවරයා අධිකරණයට දැනුම්දුන්නේය.

සිදුවීම සම්බන්ධයෙන් වාර්තාවක් ඉදිරිපත් කරන ලෙස පරිවාස නිලධාරීන්ට නියෝග කළ මහේස්ත්‍රාත්වරයා, විවිධ අවශ්‍යතා සහිත බාලවයස්කරුවන් පරිවාස මධ්‍යස්ථාන තුළ එක්ව තැබීම පිළිබඳවද සිය කනගාටුව පළකළේය.

සුමිත් ප්‍රනාන්දුගේ මරණය සම්බන්ධ විමර්ශනය අගෝස්තු 24 වනදා නැවත විභාගයට ගැනීමට නියමිතය.