පාසල් ගුරුවරියක වන තම බිරිඳ සමග සිදුකළ ලිංගික ක්‍රියා රහසිගතව රූගත කර එම දර්ශන වට්ස්ඇප් හරහා ඇගේ සිසුවකුට යැවීම සම්බන්ධයෙන් චෝදනා ලැබූ පුද්ගලයකු වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් කසුන් කාංචන දිසානායක නියෝග කර තිබේ.

ගුරුවරිය විසින් කරන ලද පැමිණිල්ලක් අනුව පොලිස් ළමා හා කාන්තා කාර්යාංශයේ නිලධාරීන් විසින් අධිකරණයට කරන ලද කරුණු දැක්වීම් අනුව මෙම නියෝගය නිකුත් කරන ලදී.

විමර්ශකයන් පවසන්නේ අසභ්‍ය දර්ශනවලට ඇබ්බැහි වී ඇති බව කියන සැකකාර සැමියා, ගෘහස්ථ ආරවුලක් හේතුවෙන් තම බිරිඳ සමඟ සිදුකළ ලිංගික ක්‍රියා රහසිගතව රූගත කර ඇති අතර පසුව ඇය යටතේ ඉගෙනුම ලබන සිසුවකුට එම වීඩියෝව යොමුකර ඇති බවයි.

පැමිණිලිකරු සහ ඇගේ සැමියා අතර මෑතකදී ඇති වූ බහින්බස්වීමක් හේතුවෙන් සැකකරු දර්ශන පළිගැනීම සඳහා යොදාගෙන ඇති බව අධිකරණයේදී තවදුරටත් අනාවරණ විය.

සැකකරු අසභ්‍ය දර්ශනවලට අධික ලෙස ඇබ්බැහි වීම නිසා ඇති වූ මානසික තත්වයකින් පෙළෙන බවට විශ්වාස කෙරෙන බව ද විමර්ශකයන් අධිකරණයට දැනුම් දී තිබේ.

කරුණු සළකා බැලීමෙන් පසු, සැකකරු අත්අඩංගුවට ගෙන අධිකරණයට ඉදිරිපත් කරන ලෙස මහේස්ත්‍රාත්වරයා පොලිස් ළමා හා කාන්තා කාර්යාංශයට උපදෙස් දුන්නේය.