මූල්‍ය වංචා චෝදනාවකට අදාළ නඩුවක් සඳහා අධිකරණයේ පෙනී නොසිටීම හේතුවෙන් හිටපු අමාත්‍ය බැසිල් රාජපක්ෂට නිකුත් කර තිබූ අත්අඩංගුවට ගැනීමේ වරෙන්තුව නැවතත් දීර්ඝ කිරීමට මාතර ප්‍රධාන මහේස්ත්‍රාත් චතුර දිසානායක අද (21) නියෝග කළේය. ඔහු මෙලෙස අධිකරණය හමුවේ පෙනී නොසිටි දෙවන අවස්ථාව මෙයයි.

මෙම නඩුව මාතර, එලියාකන්ද පාරේ, බ්‍රවුන්ස් හිල් ප්‍රදේශයේ පිහිටි රුපියල් මිලියන 60 ක් වටිනා අක්කර එකහමාරක පොල් ඉඩමක් මිලදී ගැනීමට අදාළව පවරා තිබේ.

හිටපු අමාත්‍යවරයා අධිකරණය හමුවේ දිගින් දිගටම පෙනී නොසිටීම හේතුවෙන් මහේස්ත්‍රාත්වරයා මෙම වරෙන්තුව දීර්ඝ කිරීමට පියවර ගත්තේය.

මීට අමතරව, හිටපු අමාත්‍යවරයාගේ ඇපකරුවන් සිව්දෙනාට දැඩි ලෙස අවවාද කළ ප්‍රධාන මහේස්ත්‍රාත්වරයා, ඔහුව අධිකරණය හමුවට ඉදිරිපත් කිරීමට පියවර ගන්නා ලෙස නියෝග කළේය. එසේ කිරීමට අපොහොසත් වන්නේ නම්, ඔවුන් තබා ඇති ඇප මුදල් රාජසන්තක නොකිරීමට හේතු දක්වන ලෙසද ඇපකරුවන්ට නියෝග කළේය.