ආපදා තත්ත්වය හේතුවෙන් ශ්‍රී පාදස්ථාන ප්‍රධාන ප්‍රවේශ මාර්ගයේ මහගිරිදඹ ප්‍රදේශයේ අනාරක්ෂිත තත්ත්වයට පත්ව තිබූ පියගැට පෙළ ප්‍රතිසංස්කරණය කිරීම යුද හමුදාව විසින් ආරම්භ කර තිබේ.

මෙම වසරේ ශ්‍රී පාද වන්දනා සමය 2025 දෙසැම්බර් 04 වැනිදා ආරම්භ වූ නමුත්, අයහපත් කාලගුණය හේතුවෙන් ප්‍රදේශයේ ඇති වූ නායයෑම් හේතුවෙන් මාර්ගයේ පියගැට පෙළ අනාරක්ෂිත වී තිබිණි.

ඒ අනුව, 2025 දෙසැම්බර් 11 වැනිදා සිට ක්‍රියාත්මක වන පරිදි ප්‍රතිසංස්කරණ කටයුතු සඳහා වහාම හමුදාව භට පිරිස් යොදවනු ලැබිණි.

ඉදිකිරීම් ද්‍රව්‍ය එම ස්ථානයට ප්‍රවාහනය කිරීම සඳහා අවශ්‍ය සහාය ලබාදෙමින්, භට පිරිස් 400ක් පමණ ප්‍රතිසංස්කරණ කටයුතුවල නිරතව සිටිති.

හමුදා ප්‍රකාශයකට අනුව, 300 mm පැති බැම්ම සම්පූර්ණයෙන්ම නිම කර ඇති අතර, 500 mm බිත්තියේ ඉදිකිරීම් ඊයේ වනවිට ආසන්න වශයෙන් 90%ක් අවසන් කර ඇත.

ප්‍රධාන රැඳවුම් බැම්මේ ඉදිකිරීම් කටයුතු දැනට සිදුවෙමින් පවතින අතර, වැඩවලින් 65%ක් පමණ අවසන්කර ඇත.

අත්වැට ද ආසන්න වශයෙන් 70%ක් පමණ අවසන් කර ඇත.

යුද හමුදාව පවසන්නේ මෙම ව්‍යාපෘතිය 2026 ජනවාරි 05 වැනිදා වන විට අවසන් කිරීමට අපේක්ෂා කරන බවයි.