September 3, 2025
සෙවණගල සීනි කර්මාන්ත ශාලාවට උක් ප්‍රවාහනය කිරීම සඳහා යුද හමුදාව යොදවා ආරක්ෂාවට පොලිස් විශේෂ කාර්ය බළකාය යෙදවීමට පියවර ගන්නා බවත් කුමන්ත්‍රණ පරාජය කිරීම සඳහා ගත හැකි සියලු පියවර ගන්නා බවත් කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති පැවසීය.
සෙවණගල සීනි කර්මාන්ත ශාලාව අශ්‍රිතව ආණ්ඩුව අපහසුතාවයට පත් කිරීමේ දැවැන්ත කුමන්ත්‍රණයක් කියාත්මක වෙමින් පවතින බව පෙනී යන අතර ඒ පිළිබඳ රහස් පොලීසිය මේවන විට පරීක්ෂණ ආරම්භ කොට ඇතැයි, ඊයේ (02) මේ සම්බන්ධයෙන් පැවති විශේෂ මාධ්‍ය හමුවක දී අමාත්‍යවරයා සඳහන් කළේය.
මේ සම්බන්ධයෙන් වැඩිදුරටත් අදහස් දැක් වූ අමාත්‍යවරයා මෙසේද කීය.
“හදිසියේ අලුත් තත්ත්වය නිර්මාණය වෙන්නේ පසුගිය අගෝස්තු 16 වෙනිදා ඉඳල 24 වැනි දා දක්වාම එක දිගට අවස්ථා කීපයකදී බාහිර උක් ගොවියන්ගේ වගා ප්‍රදේශවල ගිනි තැබීම් කිහිපයක් සිද්ධ වීමත් සමඟයි. සමහර මාධ්‍ය වාර්තා කරන්නේ ගිනි ගැනීම් කියලා. උක් වගා බිම්වල ලැව් ගිනි වගේ තත්ත්වයක් ඇති වෙන්නේ නැහැ. මේවා ගිනි තැබීම්. ඒ නිසා තමයි මේ තත්ත්වය නිර්මාණය වෙලා තියෙන්නේ. මේ වෙනකොට වාර්තා වෙලා තියෙනවා අගෝස්තු 16 ඉඳලා 24 වෙනිදා දක්වා ගොවීන් 153 දෙනෙකුට අයත් මේට්‍රික් ටොන් 12,840 ක් උක් යායවල් ගිනි තබා තිබෙනවා කියා. ඒ ගිනි තැබීම් සිද්ධ වෙන්නේ ඉතාම සැලසුම් සහගත විදිහටයි. මේකට හේතුව වන්නේ ගිනි තැබුවට පස්සේ කර්මාන්ත ශාලාවට සිද්ධ වෙනවා මිලදී ගන්න. ගිනි තබපු උක් කර්මාන්තශාලාවට ගැනීම එක ක්‍රමයක්. නමුත් කර්මාන්තශාලාව දැනුම්වත්භාවය ඇතිව ගිනි තියලා කර්මාන්ත ශාලාවට ඒ උක් ගන්න පුළුවන්නම් ගොවීන්ට කපන්න පහසුයි. උක් ගිනි තැබුවට පස්සේ පැය 72ක් ඇතුළත ඇඹරීමට ගන්න ඕනේ. නැත්නම් උක්වල තියෙන සීනි සාන්ද්‍රණය සහ අවශ්‍ය සංයුතිය ගන්න බැහැ.
මේක ඉතිහාසෙත් කරලා තියෙනවා. ජාත්‍යන්තරවත් කරනවා. ඉන්දියාව, බ්‍රසීලය පවා උක් යාය ගිනි තියලා නිශ්චිත පැය ගාණක් ඇතුළත කර්මාන්ත ශාලාව ගොවීන් සමඟ එකඟතාවයෙන් ඒ ගිනි තබපු උක් කර්මාන්ත ශාලාවට ගන්නවා.
පැල්වත්තේ දෛනිකව අපට අඹරන්න පුළුවන් මෙට්‍රික්ටොන් 3000යි. සෙවණගල දවසකට ආසන්න වශයෙන් මෙට්‍රික් ටොන් 950ත් 1000 ත් අතර ප්‍රමාණයක් තමයි අඹරන්න පුළුවන්. එක කටර් එකක් කැඩිලා. ඒක ප්‍රතිසංස්කරණය කරන්න මේ වෙනකොටත් ජාත්‍යන්තර මිලදී ගැනීමේ ක්‍රමවේද යටතේ ප්‍රසම්පාදන ක්‍රියාවලියට ගිහිල්ලා තියෙනවා. අවශ්‍ය සංයුතිය සහිත වූ උක් යායවලට ජනපදවලට ටෝකන් වෙන්කර තිබෙනවා. ඒ අනුවයි තමයි ගොවියෝ කර්මාන්ත ශාලාවට උක් ගේන්නේ.
ට්‍රැක්ටර් සංගමය මේ වෙනකොට ගිනි තබා විනාශ කරපු මේට්‍රික්ටොන් 140,00ක් මිලදී ගන්න කියල බලපෑම් කරනවා. එහෙම මිලදී ගැනීම කරන්නේ නැත්නම් ප්‍රවාහනය නවත්වනවා කියලා වැඩ වර්ජනයක් ආරම්භ කළා. උක් සාන්ද්‍රණය කුමක්ද, අඹරන්න පුළුවන්ද, නැද්ද කියන එක ප්‍රවාහනය ගැන නොහිතා වැඩ වර්ජනය ආරම්භ කරලා තියෙනවා. මේක තමයි ඇතිවෙලා තියෙන තත්ත්වය. ගොවියෝ හිතාමතා ගිනි තියාගෙනත් නෙවෙයි. අපි ගිනි තියලත් නෙවෙයි. නමුත් කඩාකප්පල්කාරී පිරිසක් ගිනි තියලා තියෙනවා.
මේවා මිලදී ගන්නකොට ආයතනයට අවශ්‍ය ද? ආයතනයට අඹරන්න පුළුවන්ද? ඒ මැෂින්වලට මොකද වෙන්නේ? මුකුත් සලකන්නේ නෑ. ගිනි තියපු උක් මැෂින්වල ඇඹරුනොත් අපේ කටර් කැඩෙන්න ඉඩ තියෙනවා. මේ තියෙන කටර් එකක් කැඩුණොත් අපිට සෙවණගල වහන්න වෙනවා. සෙවණගල වහල පැල්වත්තට ඔක්කොම ගේන්නත් බැහැ. කර්මාන්ත ශාලා දෙකටම දවසකට අඹරන්න පුළුවන් උක් මෙට්‍රික් ටොන් 3800 යි. සෙවණගල තවත් ගිනි තියපු නැති උක් මෙට්‍රික් ටොන් ලක්ෂයක් විතර අපිට මිලදී ගන්න තියෙනවා. එකපාර ආයතනයට දරා ගන්න බැරි ප්‍රමාණයක් ගිනි තියලා සීනි සමාගමට මේවා වහාම ගනිල්ලා කියනවා. මේවා ට්‍රැක්ටර්වලින් ගෙනැල්ලා මග අහුරලා තියෙනවා. ආයතනයට විකුණන්න ගෙනල්ලා ගොඩ ගහලා තියෙනවා මිලදී ගන්නේ නැහැ වගේ තමයි පේන්නේ. ඉතා පැහැදිලිව මේගොල්ලො වැඩ වර්ජනයක් කරනවා. ටොන් එක රුපියල් දහ දාහ ගානෙ ගන්න කියලා බලපෑමක් තමයි මේක කරන්නේ.
අපි ගොවියන්ට කියන්නේ අපිට ගන්න පුළුවන් තරම අඹරන්න පුළුවන් තරම සීනි සාන්ද්‍රණය ප්‍රමිතියට තියෙන උක් අපිට ගන්න පුළුවන්. එහෙම නැතුව ගිනි තියපු ඔක්කොම ගන්න අපිට බැහැ. ගිනි තියපු උක්වල වගකීම ගන්න ඕනේ ගිනි තියපු පිරිසයි. මේ පිළිබඳ සෙවණගල පොලීසියට අපි පැමිණිලි කරලා තියෙනවා. පොලිස්පතිතුමාට ලිඛිතව දැනුම් දීලා තියෙනවා. මේකට රහස් පොලීසිය දැන් පරීක්ෂණ ආරම්භ කර තිබෙනවා. එහෙම ආරම්භ කර තියෙද්දි තමයි මේ ට්‍රැක්ටර් සංගමය වර්ජනය ආරම්භ කරලා තියෙන්නේ. මේක ආයතනයේ කටයුතු කඩාකප්පල් කිරීමේ උවමනාවෙන් කරපු දෙයක්. වර්ජනයත් එහෙමයි. ගිනි තැබීමත් එහෙමයි.
මීට කලින් ප්‍රවාහන ගාස්තු ගෙවන්නේ නැහැ, අවසන් ගෙවීම් කරන්නේ නැහැ කියලා උද්ඝෝෂණය කළා. විපක්ෂ නායක සජිත් ප්‍රේමදාස මහත්තයා සහ විපක්ෂය සෙවණගල ගිහිල්ලා කතා කළා. මීට කලින් දවසක සෙවණගල කර්මාන්ත ශාලාවේ උක් කටර් එකට ගලක් දාන්න ගිහින් සිද්ධියක් පදනම් කරගෙන යම්කිසි තත්ත්වයක් ඇතිවුණා. එය ඉතාම පැහැදිලිව කුමන්ත්‍රණකාරී කටයුත්තක් බව අපි හිතනවා. මේවා දේශපාලන වුවමනාවකට සිද්ධ වෙනවා කියලා පැහැදිලියි. අපි ගෙවීම් දැන් සිදු කරමින් පවතිනවා. ඒ නිසා තවදුරටත් ගෙවීම් ප්‍රමාදයි කියලා උද්ඝෝෂණය කරන්න බෑ. වැටුප් ප්‍රමාදයි කියලා උද්ඝෝෂණය කරන්න බෑ. දැන් වෙන ප්‍රශ්නයක් මුල්කරගෙන වැඩ වර්ජනය කරනවා. මේක ස්වාභාවිකව ගිනි ගත්ත දෙයක් නෙමෙයි. ඉතාම සැලසුම් සහගතව දේශපාලන අරමුණක් වෙනුවෙන් රජය අපහසුතාවයට පත්කරන්න අපකීර්තියට පත් කරන්න රජයට මේක කරන්න බෑ කියලා, ඔප්පු කරන්න කරන සිදු කරන කුමන්ත්‍රණයක්. මේක ජනතාව තේරුම් ගනීවි කියලා අපි විශ්වාස කරනවා. ඒ නිසා ජනාධිපතිතුමා දැනුම්වත් කරලා ආරක්ෂක ලේකම්තුමාගේ අවසරය ඇතුව හමුදාපතිතුමා දැනුම්වත් කරලා අපි ගොවීන් දැනුම්වත් කරලා තියෙනවා. නියමිත සීනි සාන්ද්‍රණය සහිත උක් ලබා දෙන්න. ඒවා ගොවීන් කෙළින්ම ගෙනල්ලා බාර දෙන්න. ප්‍රවාහනය කරන්න බැරිනම් හමුදාව ලෑස්තියි අවශ්‍ය ප්‍රවාහන පහසුකම් ලබා දීලා ගොවි බිම්වල ඉඳලා කර්මාන්තශාලාවට උක් ප්‍රවාහනය කරන්න.ඒ වගේම ආරක්ෂාව ලබා දෙන්න කියලා පොලිස් විශේෂ කාර්ය බළකායෙන් සහ පොලීසියෙන් ඉල්ලීම කරලා තියෙනවා.
ආයතනය කඩාකප්පල් කරන්න බෑ. අපි බොහොම තදින් ඉන්නවා. ගොවීන්ට අයිතියක් තියෙනවා ට්‍රැක්ටර් සංගමයේ වර්ජනයට විරුද්ධ වෙන්න. නියමිත සාන්ද්‍රණය සහිත උක් ලබාගන්න කර්මාන්ත ශාලාවට අයිතියක් තියෙනවා. ගිනි තියපු උක් නියමිත කාලය තුළ ලබාගන්න කවුරුහරි බාධා කරනවා නම් ගොවීන්ට අකුල් හෙළනවා නම් ඒ අය ගොවි ජනතාව වෙනුවෙන් පෙනී සිටින අය නෙවෙයි. ආණ්ඩුව අපහසුතාවයට පත්කරන්න ආණ්ඩුවේ කටයුතු කඩාකප්පල් කරන්න ක්‍රියාත්මක වෙන අය. සෙවණගල පැල්වත්ත මූලික කරගෙන කරනු ලබන දැවැන්ත ක්‍රියාවලියක් මේක. පැහැදිලි කුමන්ත්‍රණයක්. මේ ආණ්ඩුව අසාර්ථකයි අමාත්‍යාංශය අසාර්ථකයි කියලා තහවුරු කරන්න හදන සැලැස්මක්. අපි මේ කුමන්ත්‍රණය පරාජය කරන්න හැකි සියලු ක්‍රියාමාර්ග ගන්නවා. මේ ආයතනයේ කවුරුහරි හිතනවනම් තමන්ගේ දේශපාලන හැකියාව නිසා මේක වට්ටන්න ආයතනය වස්සන්න පුළුවන් කියලා හිතනවනම් ඒක කවදාවත් කරන්න ඉඩ දෙන්නේ නැහැ.”
