බරපතළ ලිංගික අපයෝජන චෝදනාවකට වරදකරු කර වසර 10 ක බරපතළ වැඩ සහිත සිරදඬුවම් නියම වී සිටි බෞද්ධ භික්ෂුවකගේ එම වරදකරු කිරීමේ තීන්දුව සහ දඬුවම අභියාචනාධිකරණය විසින් නිශ්ප්‍රභ කර තිබේ.

සිද්ධියට මුහුණ පෑ බව කියන බාලවයස්කාර පැමිණිලිකරුගේ සාක්ෂිවල පවතින බරපතළ පරස්පරතා හේතුවෙන් ඒවා ‘විශ්වාසදායක නොවන’ බව පවසමින් අධිකරණය මෙම තීන්දුව ලබා දී ඇත.

2016 මාර්තු මාසයේදී විහාරස්ථානයක ආවාස ගෙයක් තුළදී 13 හැවිරිදි පිරිමි ළමයකු අපයෝජනයට ලක්කිරීමේ චෝදනාවට සීතාවක සෝරත හිමි නමැති මෙම හිමිනම අවිස්සාවේල්ල මහාධිකරණය විසින් වරදකරු කර තිබිණි.

කෙසේවෙතත්, පසුගිය සිකුරාදා (මැයි 22) ද්විපුද්ගල අභියාචනාධිකරණ විනිසුරු මඩුල්ලක් තීන්දු කළේ, අදාළ සිදුවීම සිදු වූ ආකාරය පිළිබඳව සාක්ෂිකරු විසින් ලබා දී ඇති ප්‍රකාශයන්හි කැපීපෙනෙන වෙනස්කම් හා පරස්පරතා පවතින බැවින් මහාධිකරණයේ වරදකරු කිරීමේ තීන්දුව තවදුරටත් පවත්වාගෙන යා නොහැකි බවයි.

මෙම නඩුව ප්‍රධාන වශයෙන්ම පදනම් වී තිබුණේ විහාරස්ථානය අසලින් යමින් සිටියදී තමන්ව ආවාස ගෙය තුළට කැඳවූ බවට අදාළ පිරිමි ළමයා විසින් ලබාදුන් සාක්ෂිය මතය.

මහාධිකරණ නඩු විභාගයේදී ඔහු ප්‍රකාශ කර තිබුණේ, අදාළ භික්ෂුව තමන්ට පාදවල සහ ලිංගික අවයවවල තෙල් ගාන ලෙස පැවසූ බවයි.

එහෙත් අභියාචනා විභාගයේදී භික්ෂුවගේ නීතිඥ මණ්ඩලය පෙන්වාදුන්නේ, අදාළ පිරිමි ළමයා අධිකරණයේදී ලබා දුන් සාක්ෂි සහ සිද්ධියෙන් කෙටි කලකට පසු පොලිසියට මෙන්ම අධිකරණ වෛද්‍ය නිලධාරියා (JMO) වෙත ලබා දී තිබූ මූලික ප්‍රකාශ අතර අතිශය බරපතළ පරස්පරතා පවතින බවයි.

පැමිණිලිකරුට සිද්ධියට මුලපිරුණු මූලික පසුබිම පවා එක ලෙස මතක තබාගැනීමට අපොහොසත් වී ඇති බැවින්, එය සමස්ත ප්‍රකාශයේම විශ්වාසවන්තභාවය පිළිබඳව සැක මතුකරන බව අධිකරණය නිගමනය කළේය.

නෛතික පූර්වාදර්ශයන් උපුටා දක්වමින් අභියාචනාධිකරණය අවධාරණය කළේ, එකම සිදුවීමක් සම්බන්ධයෙන් විවිධ අවස්ථාවලදී පරස්පර විරෝධී ප්‍රකාශ ලබාදෙන සාක්ෂිකරුවකුගේ සාක්ෂි මත පමණක් පදනම්ව පුද්ගලයකු වරදකරු කිරීම ආරක්ෂිත නොවන බවයි.

ඒ අනුව, මහාධිකරණය විසින් පනවා තිබූ වරදකරු කිරීමේ තීන්දුව, වසර 10ක බරපතළ වැඩ සහිත සිරදඬුවම සහ වන්දි ගෙවීමට නියම කළ නියෝගය අභියාචනාධිකරණය විසින් සම්පූර්ණයෙන්ම ඉවත දමන ලදී.

මෙම තීන්දුව වහාම ක්‍රියාත්මක කිරීම සඳහා අවිස්සාවේල්ල මහාධිකරණය වෙත යොමුකරන ලෙස ද අභියාචනාධිකරණ ලේඛකාධිකාරීවරයාට නියෝග කෙරිණි.