තමිල්නාඩු රජය අඟහරුවාදා නිවේදනය කළේ රජයේ සේවයේ නියුතු කාන්තාවන්ට ඔවුන්ගේ තුන්වැනි දරුවා සඳහා හිමිවන මාතෘ නිවාඩු කාලය වත්මන් සති 12 සිට දින 365 දක්වා දීර්ඝ කරන බවයි. මානව සම්පත් කළමනාකරණ අමාත්‍ය ඩී. සරත්කුමාර් මෙම නිවේදනය සිදු කළේ අයවැය ප්‍රතිපාදන පිළිබඳ විවාදයේදී සභාව අමතමිනි.

ශ්‍රේෂ්ඨාධිකරණ නියෝගයකින් පසුව, ජීවත්ව සිටින දරුවන් දෙදෙනෙකු හෝ ඊට වැඩි ගණනක් සිටින රජයේ සේවිකාවන් සඳහා මාතෘ නිවාඩු සති 12 කට සීමාකරමින් තමිල්නාඩු රජය පසුගිය මාර්තු මාසයේදී මූලික රෙගුලාසි 101(A) සංශෝධනය කර තිබිණි.

තම තුන්වැනි දරුවා වෙනුවෙන් දින 365ක නිවාඩුවක් ඉල්ලා සිටි රජයේ සේවිකාවකගේ නඩුවකදී මැඩ්රාස් මහාධිකරණය ද ජූනි මාසයේදී මෙම සංශෝධිත විධිවිධානය තහවුරු කළේය. සංශෝධිත නීති මාලාව යටතේ ඇයට හිමිවන්නේ සති 12ක නිවාඩුවක් පමණක් බව අධිකරණය තීන්දු කළේය.

එහෙත් මෙම නවතම නිවේදනය මගින් එම තීරණය වෙනස් කරමින්, තුන්වන දරුවා සඳහා ද දින 365ක මාතෘ නිවාඩු ප්‍රතිලාභයක් ලබාදීමට කටයුතු කර ඇත.

තමිල්නාඩුවේ සාරවත්භාවය (ජනගහන වර්ධන වේගය) පහත වැටීම සහ ජනගහනය වයස්ගත වීම සැලකිල්ලට ගනිමින්, වැඩිපුර දරුවන් ලැබීමට යුවළයන් උනන්දු කරවීම සඳහා සහන ලබාදීමට තමිල්නාඩුව සැලසුම් කරන බවට සෞඛ්‍ය අමාත්‍ය කේ. ජී. අරුන්රාජ් කළ ප්‍රකාශයෙන් දින කිහිපයකට පසුව මෙම පියවර ගෙන තිබේ. ආදේශන මට්ටම 2.1ක් විය යුතු වුවත් තමිල්නාඩුවේ සමස්ත සාරවත් භාවය 1.4කට වඩා පහත වැටී ඇති බවත්, ප්‍රාන්ත ජනගහනයෙන් 16%කට ආසන්න ප්‍රමාණයක් අවුරුදු 60ට වැඩි වයස්ගත අය බවත් අරුන්රාජ් පැවසීය.