July 25, 2024
මාර්ග රාජකාරියේ යෙදී සිටි පොලිස් නිලධාරීන් පිරිසක් විසින් මෝටර් රථයකට ගංජා දැමූ බවට තරුණයන් පිරිසක් චෝදනා කරන අයුරු දැක්වෙන වීඩියෝවක් සමාජ මාධ්ය ඔස්සේ පැතිර යෑමේ සිද්ධිය සම්බන්ධයෙන් පොලීසිය පරීක්ෂණයක් ආරම්භ කර තිබේ.
පොලිස් මාධ්ය ප්රකාශක නියෝජ්ය පොලිස්පති නිහාල් තල්දූව ප්රකාශ කර ඇත්තේ ඊයේ(බදාදා) උදෑසන කොල්ලුපිටියේ මාර්ග රාජකාරියේ යෙදී සිටි පොලිස් නිලධාරීන් පිරිසක් මෝටර් රථයක් පරීක්ෂා කරමින් සිටියදී මෙම සිද්ධිය සිදුව ඇති බවයි.
ග්රෑන්ඩ්පාස් ප්රදේශයේ සිට පැමිණි මෝටර් රථයක් පොලිස් නිලධාරීන් විසින් නතර කර පරීක්ෂාවට ලක්කර ඇති බව ඔහු සඳහන් කර ඇත.
සිද්ධිය වන අවස්ථාවේ මෝටර් රථයේ පස් දෙනෙකුගෙන් පමණ යුත් කණ්ඩායමක් සිට ඇති බව ද පැවසේ.
සෝදිසි කිරීමේදී මෝටර් රථයේ අසුනේ තිබී ගංජා ඇටවලට සමාන ද්රව්ය කිහිපයක් සොයා ගෙන ඇති බව ද පොලිස් මාධ්ය ප්රකාශකවරයා සඳහන් කර තිබේ.
එම බීජ පිළිබඳ නිලධාරීන් තරුණයන්ගෙන් ප්රශ්න කළ අවස්ථාවේදී ඔවුන් නොසන්සුන්කාරී ලෙස හැසිරී ඇත්තේ පොලිසිය එම බීජය මෝටර් රථයට දැමූ බවට චෝදනා කරමින් බව ද ඔහු සඳහන් කර තිබේ.
අදාළ වීඩියෝ පටයේ දී තරුණයන් චෝදනා කළේ මෝටර් රථයේ තිබූ මුදල් දැකීමෙන් පසු පොලිස් නිලධාරීන් කප්පම් ගැනීම සඳහා මෝටර් රථය තුළට ගංජා දැමීමට උත්සාහ කළ බවටයි.
කෙසේවෙතත්, නියෝජ්ය පොලිස්පති තල්දූව එම චෝදනාව ප්රතික්ෂේප කරමින් පවසා ඇත්තේ මෝටර් රථයේ සිටි පුද්ගලයන්ට නොසන්සුන්කාරී ලෙස හැසිරීමට ඉඩදීම එම ස්ථානයේ සිටි නිලධාරීන්ගේ වරදක් බවයි.
සිද්ධියෙන් ටික වේලාවකට පසු ජ්යෙෂ්ඨ නිලධාරියකු එම ස්ථානයට පැමිණ ගැටලුව සමථයකට පත් කර මෝටර් රථයේ සිටි පුද්ගලයන්ට පිටව යෑමට අවසර දී ඇති බව ද නියෝජ්ය පොලිස්පතිවරයා සඳහන් කරයි.
ඔහු වැඩිදුරටත් සඳහන් කර ඇත්තේ එම වීඩියෝව සමාජ මාධ්ය වෙත මුදා හැරීම සහ සමථයකට පත් වූ කරුණක් සම්බන්ධයෙන් ජනතාව නොමඟ යැවීම සම්බන්ධයෙන් සහකාර පොලිස් අධිකාරීවරයකු යටතේ පරීක්ෂණයක් ආරම්භ කර ඇති බවයි.
