ඇමරිකා එක්සත් ජනපදයෙන් ආරම්භ වූ අන්තර්ජාතිකව පිළිගත් ‘සාමයේ පාගමන’ 2026 අප්‍රේල් 21 වැනි දින සිට ශ්‍රී ලංකාවේදී පැවැත්වීමට නියමිත අතර, එය අතිපූජ්‍ය පඤ්ඤාකර හිමියන් සහ භික්ෂූන් වහන්සේ දොළොස්නමකගෙන් යුත් දූත පිරිසකගේ නායකත්වයෙන් සිදුකෙරේ.

දිවයින පුරා දින හතක් දිවෙන මෙම වන්දනා චාරිකාවේ අරමුණ සහ සංකල්පය බුදුන් වහන්සේගේ ඉගැන්වීම වන “චරථ භික්ඛවේ චාරිකං බහුජන හිතාය බහුජන සුඛාය ලෝකානුකම්පාය” (භික්ෂූනි, ලෝකය කෙරෙහි අනුකම්පාවෙන් බොහෝදෙනෙකුගේ සුභසාධනය සහ සතුට සඳහා සැරිසරන්න) මත පදනම් වේ.

මෙම වැඩසටහන සමාජය තුළ සාමය සහ කරුණාව ප්‍රවර්ධනය කිරීම අරමුණු කරයි.

සාමය බලහත්කාරයෙන් ලබාගත නොහැකි බවත්, සිහිකල්පනාව තුළින් පියවරෙන් පියවර වගාකළ යුතු බවත් ප්‍රායෝගිකව පෙන්නුම් කිරීමක් ලෙස එය ක්‍රියාකරයි.

මෙම පාගමනේ සමාරම්භක උත්සවය 2026 අප්‍රේල් 21 වැනි දින අනුරාධපුරයේදී පැවැත්වීමට නියමිතය.

ජය ශ්‍රී මහා බෝධීන් වහන්සේ ඉදිරිපිට පස්වරු 4:00ට විශේෂ වන්දනාවක් පැවැත්වෙන අතර, පසුව පස්වරු 5:00 ට රුවන්වැලිසෑය පරිශ්‍රයේදී විශේෂ ආගමික වතාවත් සිදුකෙරේ.

ඉන්පසු, පා ගමන දඹුල්ල රාජකීය ලෙන් විහාරය වෙතත් අනතුරුව මහනුවර දෙසටත් ගමන් කරනු ඇත.

මහනුවරට ළඟා වූ පසු, මහා සංඝරත්නය මල්වතු සහ අස්ගිරි පාර්ශවයන්හි ප්‍රධාන නාහිමිවරුන් වෙත ගෞරව දැක්වීමට නියමිත අතර, පසුව ආශිර්වාද ලබාගැනීම සඳහා ශ්‍රී දළදා මාලිගාව වෙත පැමිණෙනු ඇත.

මෙම සංචාරයේදී, ජය ශ්‍රී මහා බෝධීන් වහන්සේගේ ශාඛාවක් හා හුණුපිටිය ගංගාරාමයෙන් ලබාගත් පූජනීය ධාතූන් වහන්සේලා, ඓතිහාසික නීලගිරි චෛත්‍යය, හඟුරන්කෙත මාදන්වල රාජමහා විහාරය සහ මහියංගණ රාජමහා විහාරය ඇතුළු පුජනිය ස්ථාන රැසක් වෙත රැගෙන යනු ඇත.

මෙම පාගමන 2026 අප්‍රේල් 28 වැනි දින කොළඹ නිදහස් චතුරශ්‍රයේදී අවසන් වේ.

ඉන්පසුව, පූජනීය ධාතූන් වහන්සේලා සහ ජය ශ්‍රී මහා බෝධියේ පූජනීය ශාඛාව නිදහස් චතුරශ්‍රයේ සිට කොළඹ හුණුපිටිය ගංගාරාම විහාරස්ථානය දක්වා පෙරහැරකින් වැඩම කිරීමට නියමිතය.

දින හතක පා ගමන අවසානයේ, 2026 අප්‍රේල් 28 වැනි දින කොළඹ නිදහස් චතුරශ්‍රයේ දී විශේෂ රාජ්‍ය උත්සවයක් පැවැත්වේ.

ඊට සමගාමීව, 2026 අප්‍රේල් 28 සහ 29 යන දිනවල ගංගාරාම පරිශ්‍රයේ දී ජාතික නිර්මාණ මධ්‍යස්ථානය විසින් ශ්‍රී ලංකාවේ බෞද්ධ උරුමය සහ සාම්ප්‍රදායික අත්කම් ප්‍රදර්ශනය කරන විශේෂ ප්‍රදර්ශනයක් සංවිධානය කරනු ලැබේ.

මෙම ආගමික-සංස්කෘතික වැඩසටහනේ මූලික අරමුණ වන්නේ ඇමරිකා එක්සත් ජනපදයේ ටෙක්සාස් හි ව්‍යාපෘතියකට ශ්‍රී ලංකාවේ බෞද්ධ හා සංස්කෘතික උරුමය දායක කිරීමයි.