August 2, 2025
පොලිසිය විසින් අත්අඩංගුවට ගෙන අධිකරණයට ඉදිරිපත් කරන ලද විදේශීය මත්පැන් තොගයක් අධිකරණ නියෝගයක් මගින් විනාශ කිරීමට යෑමේ දී ඒවා ජලය සහ තේ පැහැති ද්රවයක් බවට පත් කිරීම සම්බන්ධයෙන් වගකිව යුත්තේ කවුරුන්ද යන්න අනාවරණ කර ගැනීමට කොළඹ ප්රධාන මහේස්ත්රාත් තනුජා ලක්මාලි කොළඹ අපරාධ කොට්ඨාසයට (CCD) නියෝග කර තිබේ.
මේ සම්බන්ධයෙන් රජයේ රස පරීක්ෂකවරයාගෙන් වාර්තාවක් ලබා ගන්නා ලෙස ද මහේස්ත්රාත්වරිය නියෝග කළාය.
අධිකරණයේ නඩු භාණ්ඩ කාමරයේ ගබඩා කර තිබූ විදේශීය මත්පැන් බෝතල් 81ක් සහ බියර් බෝතල් 150ක් පරීක්ෂාව සඳහා රජයේ රස පරීක්ෂකවරයාට භාර දෙන ලෙස ප්රධාන මහේස්ත්රාත්වරිය වැඩිදුරටත් නියෝග කළාය.
මෙම මත්පැන් තොගය පෙබරවාරි 17 වැනිදා කොළඹ අතිරේක මහේස්ත්රාත් පසන් අමරසේකර විසින් විනාශ කිරීමට නියෝග කර තිබිණි.
විනාශ කිරීමේ ක්රියාවලියේදී, එහි අඩංගු ද්රව්ය සැබෑ මධ්යසාර නොවන බව මහේස්ත්රාත්වරයාට නිරීක්ෂණය වී තිබේ.
එහි ප්රතිඵලයක් ලෙස, බෝතල් නැවත මුද්රා තබා අධිකරණයේ නඩු භාණ්ඩ කාමරයේ නැවත ගබඩා කිරීමට නියෝග කරන ලදී.
බෝතල්වල තිබූ මත්පැන්, ජලය සහ තේ පැහැති ද්රවයක් බවට පරිවර්තනය කළේ කවුරුන්ද යන්න පිළිබඳ වහාම පරීක්ෂණයක් පවත්වන ලෙසද මහේස්ත්රාත්වරිය ඉල්ලා සිටියාය.
අන්තර්ගතයන් වෙනස් කිරීම සම්බන්ධයෙන් රජයේ රස පරීක්ෂකවරයාගෙන් වාර්තාවක් ලබා ගැනීමට පොලිසිය කළ ඉල්ලීමට අවසර දීමෙන් පසු මහේස්ත්රාත්වරිය මෙම නියෝගය නිකුත් කළාය.
