චීනයේ නිල ගුවන් සේවය බීජිං සහ උතුරු කොරියාවේ ප්යොංයැං අගනුවර අතර සෘජු ගුවන් ගමන් අද සිට නැවත ආරම්භ කර තිබේ.

උතුරු කොරියාවේ චීන තානාපති වැන්ග් යජුන් සහ අනෙකුත් රාජ්‍ය තාන්ත්‍රිකයන් විසින් එයාර් චයිනා ගුවන් යානය පිළිගනු ලැබූ බව චීන රාජ්‍ය මාධ්‍ය වාර්තා කරයි.

චීනයේ සිට උතුරු කොරියාව දක්වා මගී දුම්රිය සේවාව මාර්තු 12 වැනිදා නැවත ආරම්භ විය.

2020 දී කොවිඩ් 19 වසංගතය ආරම්භයේ සිට උතුරු කොරියාවට ගුවන් ගමන් සහ මගී දුම්රිය අත්හිටුවා තිබිණි.

උතුරු කොරියානු ගුවන් සේවය වන එයාර් කොරියෝ 2023 දී අගනුවර අතර ගුවන් ගමන් නැවත ආරම්භ කළේය.

වසංගතය අතරතුර උතුරු කොරියාව සියලුම විදේශීය සංචාරකයන් තහනම් කළ නමුත් සීමාවන් ලිහිල් කිරීමට පටන් ගැනීමත් සමග 2024 දී රුසියානු සංචාරක කණ්ඩායමක් රටට ඇතුළු විය.

තහනමට පෙර චීන සංචාරක කණ්ඩායම් උතුරු කොරියාවට පැමිණෙන සියලුම අමුත්තන්ගෙන් 90%ක් වූ අතර චීන සංචාර නැවත ආරම්භ කිරීම ප්‍රමාද වීම නිරීක්ෂකයන් පුදුමයට පත් කර තිබිණි.

චීනය උතුරු කොරියාවේ විශාලතම වෙළඳ හවුල්කරුවා සහ ප්‍රධාන සගයා වන නමුත්, දකුණු කොරියාව සහ ඇමරිකා එක්සත් ජනපදය ඉලක්ක කර ගැනීම සඳහා භාවිත කළ හැකි මිසයිල අත්හදා බැලීම් උතුරු කොරියාව විසින් දියත් කිරීම සම්බන්ධයෙන් චීනය වසර ගණනාවක් තිස්සේ අප්‍රසාදය පළ කර තිබේ.

උතුරු කොරියානු නායක කිම් ජොන් උන් සැප්තැම්බර් මාසයේදී දැවැන්ත හමුදා පෙළපාළියකට සහභාගී වීම සඳහා චීනය වෙත ගිය අතර, දශක ගණනාවකට පසු උතුරු කොරියානු නායකයකු චීන හමුදා පෙළපාළියකට සහභාගී වූ පළමු අවස්ථාව එය විය.