වසර තුනක් ගතවී ඇතත්, විවිධ පාර්ශව සහ කණ්ඩායම් බලපෑම් කළද, බිලියන 16ක බදු ආදායමක් රජයට අහිමි කළ සීනි වංචාව සම්බන්ධයෙන් තවමත් පරීක්ෂණ අවසන් වී නොමැත.

2020 ඔක්තෝම්බර් මාසයේදී සීනි ආනයනය සඳහා වූ බද්ද රුපියල් 50 සිට ශත 25 දක්වා හදිසියේ අඩුකරන බව එවකට ගෝඨාභය රාජපක්ෂ ආණ්ඩුව ප්‍රකාශ කළේය.

දේශපාලන අනුග්‍රහය ලබන ආනයනකරුවන් පිරිසකට මෙම අඩුකිරීමෙන් ප්‍රතිලාභ ලැබුණේ, රාජ්‍ය භාණ්ඩාගාරයට අත්‍යවශ්‍ය වූ රුපියල් බිලියන 16ක මුදලක් අහිමි කරමිනි.

එවකට පාර්ලිමේන්තු මන්ත්‍රී අනුර ප්‍රියදර්ශන යාපාගේ ප්‍රධානත්වයෙන් යුත් රාජ්‍ය මුදල් පිළිබඳ කාරක සභාව (COPF) ද මේ සම්බන්ධයෙන් කරුණු විමසා, මෙම වංචාව පිළිබඳ තොරතුරු අනාවරණය කළේය.

පසුගිය වසර තුන තුළ මේ ප්‍රශ්නය සම්බන්ධයෙන් දේශපාලඥයන් ඇතුළු විවිධ පුද්ගලයන් මේ ප්‍රශ්නය මතු කළත්, තවමත් විමර්ශන අවසන් වී නැත.

විපක්‍ෂයේ ප්‍රධාන සංවිධායක ලක්‍ෂ්මන් කිරිඇල්ල ඊයේ පාර්ලිමේන්තුවේදී යළිත් එම කාරණය මතුකළ අතර, මේ වන විටත් මුදල් හිඟයකින් පෙළෙන රජයට විශාල පාඩුවක් සිදුවී තිබියදීත්, පරීක්‍ෂණ සිදුනොකළේ මන්දැයි විමසා සිටියේය.

“රජය ආදායම් අර්බුදයකට මුහුණ දී සිටිනවා. එතකොට අපි කොහොමද මේ වගේ ආර්ථික අපරාධ ඉවසන්නේ?” ඔහු විමසීය.

ඊට පිළිතුරු දෙමින් රාජ්‍ය ගිණුම් පිළිබඳ කාරක සභාවේ (COPA) සභාපති ලසන්ත අලගියවන්න පැවසුවේ, අල්ලස් හෝ දූෂණ චෝදනා විමර්ශන කොමිෂන් සභාව විමර්ශන සිදුවෙමින් පවතින බව දන්වා ඇති බවයි.